ЗЭВ ВАЖӦН КАДЫН

Коркӧ важӧн-важӧн, сьӧд вӧр пӧвстті, полігтырйи, дзебсясигтырйи мыччасисны пасьтӧм йӧз.

Тшыгйыд, полӧмыд ӧтувтӧма найӧс.

Быдӧн корсьӧны кынӧмпӧт. Быдӧнысь видзчысьӧны; кывзысьӧны. Пӧрысьяс томъясӧс велӧдӧны. Ставныслӧн ӧти пӧлӧс дум, дугдывтӧм дум: тшыг да полӧм, тшыг да полӧм.

Гӧгӧрныс эськӧ лэбалӧ, котралӧ, дугдывтӧг жуӧ быдсяма пӧтка, звер да — он, буракӧ, кут куш кинад. Ӧружйӧ некутшӧм абу-а. Пӧтка, звер — вӧйӧсь, оз шедны. Пӧткӧдчыны лоӧ мыйӧнсюрӧ: тшакӧн, вужъясӧн, ӧрӧжкиӧн, вотӧсӧн, быдсяма быдманторнас. Сёйӧны шыръясӧс, змейясӧс, лёкгагъясӧс, вегыльясӧс, быдсяма гагсӧ; корсюрӧ — пӧтка колькъяс. Сёйӧны быдтор ульнас, путӧг: пиньяс, черлыяс налӧн ёнӧсь. Чорыдджыкторъяс жугӧдлӧны изйӧн. Весиг сэтшӧм сёяныс эз вӧв быдлун тырмымӧн. Унджыксӧ тшыг нисьӧ пӧт олісны.

Медводдза йӧзлы вывті сьӧкыд вӧлі кынӧмпӧт перйыны. Ӧні на кӧнсюрӧ эмӧсь дикаръяс, медводдза йӧз моз кынӧмпӧт перйысьяс.

Америкаын эмӧсь пешересъяс (дикаръяс), найӧ чери-яйтӧ ловъя вывсьыс, ульнас сёйӧны. Звертӧ кыясны да понъясыскӧд, кулигмозыс, сёясны. Чӧскыдпырысь сёйӧны найӧ берег вывъясысь морскӧй зверъяслысь дука шойнысӧ. Ӧти, шой вылас кайӧмӧн, шулялӧ да шыблалӧ мукӧдыслы яйторъяссӧ. Мырддьысьӧмӧн, косясьӧмӧн сёйӧны сісьмӧм яйтӧ. Пӧткаястӧ куштытӧгыс чуж-чажвартасны да вирнас и ставнас сёйӧны.

Медводдза йӧз узьлісны пуяс вылын, гыркса пу пытшъясын^Сісь сьӧвмӧса/^, гуясын да. Лун и вой быдторйысь полігтырйи, тшыгйӧн, кӧдзыдӧн, няйтӧн олісны.