ОШ ЙЫЛЫСЬ

Ошкыдлы вотӧсыд зэв сьӧлӧм вылас воӧ: ӧмидз, чӧд, матӧ сёйӧ и. Матӧ судзӧдігад эськӧ сійӧс ёна жӧ малязіясыд ӧбӧдитасны да. Пуксяласны, кӧласясны нырас, вомас, паръяс, пеляс, гӧнас и быдлаӧ. Дерт эськӧ, ошкыд водзсасьӧ жӧ накӧд да. Кор манад лякӧссяс, сэки малязіясыд сьӧд пуксьӧмаӧсь сы вылӧ. Ош ёна радейтӧ быдсяма пӧлӧс пӧтка-лэбачьястӧ, яйтӧ. Мукӧддырйи, пон моз, вӧтлысьӧ сёнъяс пӧлӧн утка бӧрсяыд. Сэки сійӧ няйтчас-кӧтасяс да, ёна и мисьтӧм лолӧ. Сэсся ошкыд шыръястӧ-гагъястӧ сёйӧ. Ыж-балятӧ, куканьястӧ эськӧ сёйӧ нин да, сюрлӧны кӧ. Тӧв кежлад ошкыд оланін лӧсьӧдӧ. Сьӧд вӧр шӧрӧ кодъяс гу, сэтчӧ турун-нитш вольсалас. Сэсся сэні тӧвбыд узьӧ, вольпасьын моз, лапасӧ нёнялігтырйи. Кыйсьысьяс кӧ казяласны ош гутӧ, торкасны узьӧмсьыс: ошлы лоӧ садьмыны, пышйыны, оз кӧ вермыны вины.