ОВМӦСТӦ НУӦДНЫ КОЛӦ КУЖНЫ

Майбыровлӧн керка эштіс. Зэв бура-долыда найӧ овмӧдчисны сэтчӧ. Ачыс ӧд, Петыр Семӧыд, зэв зіль, сэсся вина оз ю ни, картіӧн оз ворс ни. Овмӧстӧ нуӧдны кужӧ и, прӧста кытчӧсюрӧ нинӧм оз шыбит. Видз-мутӧ уджалӧ выль ногӧн, нигаяс серти. Сійӧн ӧд и няньыд сылӧн пыр бура воӧ. Ӧшинь увъясыд, керка-картаыд — гӧгӧр дзим-дзурк — пелькӧдӧма. Ёг-няйт кисьтавны вӧчӧма вевта гу да известкаӧн киськалӧма, мед дукыс оз пет.

Наталля зэв авъя, лабутнӧй ань. Быдтор сылӧн артмӧ; немтор оз шыбитчы, оз туплясь ни. Сёян-юаныд оз шоммы небось, оз бакшась. Паськӧмтӧ — дӧмлӧма, вурлӧма. Деньгатӧ кытчӧсюрӧ оз шыблав. Водзвыв арталас, кытчӧ мыйта колӧ видзны. Сэсся ӧд уджйӧзад некор жӧ абу вӧйӧмаӧсь.