ВАСЮКЛӦН БАТЬЫС ВЫЛЬ КЕРКА ВӦЧИС

І.

Революция бӧрын Васюклӧн батьыс выль керка босьтчис вочны. Тӧвбыд кер лэдзис, кыскаліс да. Тулысын, му сылӧм-косьмӧм бӧрын кутіс лӧсьӧдны керка места. Кодйис кык аршын судта гуяс. Гуяссӧ тыртіс изъясӧн, изъяссӧ киськаліс известкаӧн, выліас тэчис кирпич фундамент. «Тадзитӧ пӧ бурджык лоӧ, оз керка пельӧсъясыд вӧй ни, керкаыд оз пӧлыньтчы ни».

Сэсся вӧлись паніс керкатӧ. Медулі керъяссӧ сираліс, мед оз сісьмыны. Керъяс костӧ пукталіс пакля. Стенъяс лэптӧм бӧрын пуктісны матичьяс, вольсалісны пӧтӧлӧк да. Сэтчӧ му катлісны. Сэсся керка юралісны.

ІІ.

Сы бӧрын Петыр Семӧ керка пытшкӧс дінас кутчысис. Джодж матичьяс вылӧ лӧсьӧдіс мудӧд: мудӧд вылӧ катлісны му. Сы вылӧ джодж вольсалісны. Сэсся Семӧ ӧшинь-ӧдзӧс писькӧдліс, сувтӧдаліс куричьяс, ӧшиньяс стеклӧаліс да. Васюклы керка пытш удж содӧмыд зэв нимкодь: со ӧдзӧс дзиръялӧмаӧсь, со пач тэчӧмаӧсь, вежӧс вӧчӧмаӧсь, ӧтар джынъяс пач вомыс петӧ, — сійӧ пӧжасянін, мӧд джынйыс — горнича. Со гӧгӧр лабичьяс, пызан, крӧвать. Паччӧр бердӧ вӧчисны гӧбӧч выв да пӧлать.

— Сэсся нӧ, — шуӧ Васюк: — дзикӧдз нин эштіс?

— Эз на, пиукӧй, — шуӧ батьыс: — лоӧ на нӧшта сюявны ывласяньыс, пытшкӧссяньыс и, сэсся мавтыштавны кытсюрӧ да, мед эськӧ лоӧ мичаджык да шоныд, мед дырджык оз сісьмы да.