МЫЙЛА ЙИ ОЗ ВӦЙ

Из кӧ ваӧ шыбитам — вӧйӧ. Йи оз вӧй. Мыйла нӧ? Изйыд ва дорсьыд сьӧкыд, сійӧн и вӧйӧ. Йи кокниджык ваысь, сы понда оз вӧй. Ваысь сьӧкыдтор вӧйӧ, кокнитор оз вӧй. Со босьтам кӧрт, ыргӧн, сакар, из, му — найӧ ставыс вӧйӧны. Пу, нянь да уна мукӧдтор оз вӧйны.

Йиыс нӧ мыйла оз вӧй, сійӧ ӧд ваысь жӧ артмӧма? Ваыд кынмӧмсьыд паськалӧ, йӧрышыс ыдждӧ да сы вӧсна кокнялӧ ас йӧрыша ва сертиыс. Ва кӧ кынтан сулеяӧ, сійӧ, йиӧ пӧригас паськалӧм пондаыс, сулеясӧ жугӧдас. Валӧн кынмигас вывті ыджыд выныс. Кӧрт дозйӧ кӧ ёна тупкӧмӧн кынтан, и сійӧс жугӧдас. Ва кодь торйыд этша, кӧдзыдсьыд паськалысьыд. Унджыкторйыс кӧдзыдсьыд топалӧ, сьӧктаммӧ, а ваыд паськалӧ да кокняммӧ.

Ваыд кӧ эськӧ топалі, йиыд эськӧ ваяс вывсьыд вӧйи. Сэк эськӧ ва вевдорас ваыс бара выльысь кынмис да йиыс бара вӧйи. Сідзтӧ эськӧ юясыд пыдӧсӧдзыс кынмисны, весиг гожӧмнад эз сывны. Чериыс и, став вапытшса олысьыс и куліны.