ЛЫСВА, РУ ДА КЫМӦР

Мусьыд да васьыд век кайӧ сынӧдад синмӧн аддзытӧм ру (рочӧн кӧ шуны: пар). Сынӧдыс кӧ кӧдзалӧ, сэтшӧм руыс пӧрӧ синмӧн аддзан руӧ (рочӧн кӧ шуны: туман). Кӧдзыдінын кыкнан пӧлӧс русьыс артмӧны ва войтъяс, либӧ пуж, либӧ лым чиръяс.

Шоныд дырйи шоныд керка пытшкад ва руыд оз тыдав. Ывлаыс кӧ кӧдзалӧ, керка ӧшиньясыд кӧдзалӧны жӧ. Сэки ӧшинь дор керка пытш сынӧдсьыс ва руыд пӧрӧ тыдалан ва руӧ, либӧ ва войтъясӧ. Сы вӧсна ӧд и ӧшиньыд руалӧ, либӧ вазьӧ.

Гожӧмын, сэзь войяснад, сынӧдыд ывлавылад кӧдзалӧ жӧ. Сы вӧсна ӧд лӧнь дырйиыд и руалӧ сэки увтасінъясыд (синмӧн аддзан ру).

Руыс кӧ уна, сэк сійӧ пӧрӧ ва войтъясӧ да лысва вӧчас. Кынмалан кӧдзыд дырйи лысваыс пужйӧ пӧрӧ.

Кор сынӧдас тыдавтӧм ва руыс зэв уна, сэки сыысь кымӧр чужӧ. Кымӧрыс — сійӧ чукӧра тыдалан ва ру. Кӧдзыд вӧсна кымӧрса ва руыс пӧрӧ ва войтъясӧ, либӧ лым чирйӧ да бӧр муӧ усьӧ.