ТӦВСЯ РЫТ
Рыт. Пызан вылын дзузгӧ би. Керка пытшкӧс муртса тӧдчыштӧ. Тыдалӧ сӧмын Васюклӧн юрыс да нигаыс пызан сайын. Джодж шӧрын, вольпась вылын узьӧ ичӧтик ныв. Мам потан дорын швыргӧ-печкӧ. Шы ни тӧв. Васюк лэптіс юрсӧ.
— Мамӧ! — юалӧ: — батьӧыд нӧ заводад пес кералӧ?
— Пес, дерт, — шуӧ мамыс: — тӧд вылад уси?
— Уси... Ме буретш заводӧ ветлӧм йылысь лыддя.
— Дивӧ тай, сы йылысь гижӧма и? Мый йывсьыс нин ӧні оз гижны? — да ӧд ещӧ комиӧн!
— Гижӧма, мамӧ... заводас медасьӧмсӧ, мунӧмсӧ и, сэні уджалӧмсӧ, олӧмсӧ и. Ёна жӧ, мамӧ, сьӧкыд вӧлӧма войдӧр заводад уджавныд...
— Тӧда, небось, ас вывті мунліс. Сизим туй лои ныв дырйи ветлӧма Богословад. Собалӧма этша пидзӧсӧдз лымйын. Сьӧкыд, пиукӧй, заводса чурка помыд!
— Мыйла нӧ, мамӧ, нывбабаыс ветлӧны заводас?
— Мыйла гӧльӧсь. Нажӧткаыд ӧд со колӧ: няньыд оз судзсьы, кӧмкот-паськӧмтӧ оз вермыны лӧсьӧдны бать-мамыд...
— Мыйла нӧ эськӧ батьыд гортын оз нажӧвит. Сэк эськӧ тэныд турун-пестӧ эз ло ӧтнадлы кыскавны. Ӧдюкыд эськӧ кага дінсьыд мыніс велӧдчыныд и.
— Бура эськӧ да. Горт дінад тай оз зэв туплясь нажӧткаыд. Бур йӧз тай эськӧ со кер лэдзӧны да. Сэтчӧ ӧд бара жӧ колӧ турун-нянь, ён вӧв да, ямщик да. Мукӧд удж вылӧ морттуйным оз тырмы дай.
— Ме, мамӧ, карад лэччылігӧн зэв уна пу дозмук аддзылі, сёй дозмук да. Туистӧ, пызан улӧстӧ мыйта вӧлі вайӧмаӧсь...
— Сэтшӧм киподтуйнад, дерт, сэсся оз ков заводӧ ветлыны. Миян Эжва вожын кодь гӧль да няньтӧм йӧзыс ӧд некӧн абу. Сыктыв вожад, майбыр, няньыд пыр артмӧ. Лёк вонад став кӧлуйнымӧс сэтчӧ нянь вылӧ вежлавны лолі.
— Сыктывсаыд пӧ тай зэв жӧ ёна ветлӧны вурсьыны. Сэні пӧ кыз йӧзыс вурсьысь-швеч. Гортаныс пӧ сӧмын жӧ гожӧм кежлӧ, миян батьяс моз, волывлӧны.
— Вурсьӧмыд ӧд абу на пес кералӧм. Прӧста ӧд сэні вурсьыны ветлӧмсӧ оз шуны гуляйтӧмӧн.
— Петыр Мишыд гын сапӧгтӧ вӧчалӧ да, оз жӧ ков заводад ветлыныд, кертӧ лэдзны ни. Газетӧ да нигаӧ гижӧма, велӧдчӧмнад пӧ турун-няньтӧ бурджыка кутан вӧдитны да олӧмыд кокняммас. Ме, бара, мамӧ, зэв ёна велӧдча...
— Тырмас, — шуӧ мамыс Васюклы: — ёна нин больгин, — ачыс очсалігтырйи идралӧ печкансӧ: — водам: аски водз колӧ чеччыны, мед кыкысь вола турунла.
