КУЙӦД ПЕТКӦДӦМ

Куйӧд петкӧдан кад. Челядь сідзи и лэбалӧны вӧлӧн. Настукӧс бать-мамыс оз лэдзны кыскасьны: «Велӧдчыны пӧ тэныд колӧ».

Ветлӧдлӧ Настук школаӧ, мукӧд челядь вылӧ вежалігтырйи.

Ӧти асывводз мунӧ школаӧ, а паныд локтӧ Матрен тьӧтка:

— Лок, — шуӧ: — сисьйӧг, миянлы талун кыскасьышт, ямщиктӧмӧсь колим.

Эз тай ков кыкысь тшӧктыныд — ӧдйӧ ӧмӧй нимкодьпырысь эз мун.

Матрен тьӧтка Настукӧс пасьтӧдіс, кӧмӧдіс да сувтӧдіс додь нырӧ.

Лунтыр долыдапырысь кыскасис Настук, рытнас сьӧлӧм бурмытӧдз гажӧдчис челядькӧд.