ОШ КЫЙЫСЬ ПЕДӦР

Еджыд дукӧса-шапкаа, кучик лазъя, чера-пищаля мунӧ Тима Педӧр лызьӧн вӧрӧд. Водзвылас понйыс. (Лӧсьыд жӧ нин лызьнад ветлӧдлыныд, он бара вӧй!) «Мыйкӧ тай нӧ», — мӧвпалӧ: — «талун зэв дыр некодӧс огӧ аддзӧ, Серко эз на весиг увтыштлы, зэв ачыс исасьӧ-а». Ачыс ӧтарӧ пырӧ сук, пемыд, козъя вӧрӧ. Серко вӧлі мунӧ воськов кызь водзын. Друг сійӧ воши, быттьӧкӧ сылі. Сӧмын кыськӧ пыдысь чилӧстӧм шытор кылыштіс.

Педӧр муніс чилӧстӧм шыад. Гӧгӧр видзӧдліс. Сэсся зэв зіля кутіс швачкыны — керавны медматысса пусӧ. Сӧмын ӧти пу на удитіс пӧрӧдны, — мурӧстӧм шы кыліс кок увсьыс. Педӧр кыкнан кинас черсӧ кутігтырйи воськовтіс. Лым улысь юр тыдовтчис. Педӧр мый вынсьыс чернас сӧтыштіс юрад. Юр воши.

«Омӧля пӧ кучки да, тайӧ петас на».

Недыр мысти бара юр мыччысис. Педӧр мӧдысь мый вынсьыс косьыштіс юрад. Юр бара воши.

«Эз на ӧд», — мӧвпалӧ: — «кӧнкӧ, кув морыд!»

Ачыс век на кыкнан кинас черсӧ кутӧ: сӧтны лӧсьӧдчӧма. Збыль ӧд коймӧдысь ошкыд быльс мыччысис. Педӧр ош винёвлун вылӧ лёкмӧмӧн косьыштіс, да быдсӧн черыс сибдылі.

«Абу кӧ пӧ нин тайӧ ош-а, сюраыс кӧ пӧ нин тайӧ-а. Час, гашкӧ, нёльӧдысь на петалас да».

Вель дыр виччысис Педӧр. Сэсся зор сюйис гуад:

«Ловъя кӧ пӧ ош, мурӧстас».

Эз некод шыась.

«Вӧлись морыд кулі!»

Пырис ош гуӧ. Видзӧдӧ да: гуын куим ош шой.

«Кыськӧ тай дивӧыд лоӧ, ме ӧтиӧс пыдди кыйи-а».

Поныдлӧн ӧд лы ни ку жӧ эз сюр. Буракӧ, гуас усигмозыс и ур-вар керӧмаӧсь. Педӧр гортас куим ош ку лэччӧдіс.