ОШ КЫЙЫСЬ АЯ-ПИА

Педӧрлы вӧлі дас квайт арӧс на. Айыс сійӧс катӧдіс ошкӧс кыйны гуысь. Лымъя нин вӧлі. Зэв сэзь, кос асывводзын шарксьӧдӧны ая-пиа вӧр туй кузяыс. Кыкнанныс чераӧсь, шыаӧсь, пуртаӧсь да пищаляӧсь. Водзвыланыс котӧртӧ сера понныс. Пон юрсӧ лэдзӧма, исасьӧ. Воисны сук козъя вӧрӧ.

Тима сувтовкерыштіс, видзӧдліс гӧгӧр.

«Вай жӧ пӧ, пиӧ, тайӧ козъяссӧ пӧрӧдыштлам».

Пӧрӧдісны орччӧн кык коз пу; на вылӧ вомӧнӧн мӧд кыкӧс. Пуяс шӧрас сӧмын ичӧтик кост коли. Педӧр кыв ни джын оз шу: отсасьӧ. Тима сутшкис пуяс костад шынад, сэні «ур-вар» — кыліс мурӧстӧм шы. Сэсся быллёв мыччысис ош юр. Кӧсйис эськӧ ошкыд ыткӧбтыны пуяс костӧдыд да, эз тӧр. Тима чернас косьыштіс ошкыдлы юрас. Ош воши гуӧ. Вель дыр кывзысисны, — виччысисны ошлысь мыччысьӧм. Сэсся Тима сувтӧдіс Педӧрӧс гу бердас, ачыс шынас гурыштіс пытшсӧ. Шы ни гӧлӧс. Видзӧдласны кӧ — ошкыд кулӧма нин. Сэк ая-пиа кыскисны ошкӧс гусьыс да кулисны.