КАТШЫС

Ӧртьӧм чожлӧн эм бур чӧс туй. Сэні сылӧн эм вӧр керка. Кузь арбыд сійӧ сэтысь оз волывлы. Каяс чӧс туйӧ ю кузя. Катӧдас пыж тыр сёян арбыд кежлӧ: кос нянь, вый, сов да мый да. Ӧртьӧм чож оз ӧтнас мун вӧрад, сылӧн эм бур ёрт: Катшыс нима пон, зэв ныриса, вежӧра да. Уна сьӧла-ур нин сійӧ Ӧртьӧмлы отсаліс кыйны. Эз этша Ӧртьӧм и руч-кӧч кый сыкӧд. Ошсьыд на оз зэв вӧлі повны и. Кор вӧлі умасны пӧтка яйысь, Ӧртьӧм чож лэччылас юӧ чери кыйыштны. Катшыс кольччас керка видзны, кыр йылӧ водас да.

Сэні Ӧртьӧм чӧс туй кындзи эмӧсь мукӧд чӧс туйяс. Вӧралысьыд тыр арнад. Ӧтчыд ю пӧлӧн вӧр пӧвстті каньзьӧдӧ-мунӧ Закар Семӧ Ӧртьӧм вӧр керка дорӧ, казялӧма сылысь чери кыйны мунӧмтӧ да. Катшыс эськӧ мурӧстліс жӧ да, Семӧ пыдди эз пукты: пырис керкаад. Пырис, мыйсюрӧ сюяліс ноп тырыс, да кӧсйӧ бӧр петны, а Катшысыд ӧдзӧс дорас нин. Семӧ кӧсйӧ на порог вомӧныд воськовтны-а, Катшысыд эрыштчӧмӧн нин уськӧдчис сы вылӧ: бӧр кокъяс вылас сувтіс да, водз кокъяснас пельпомъясас шарашитчӧ. Семӧ кынмис повзьӧмысла. Кияссӧ весиг оз лысьт вӧрзьӧдны. Катшыс тшапнитӧмӧн чужӧмас кутчысьӧ. Ӧртьӧм локтӧдз сулӧдіс сійӧс Катшысыд. Семӧ яндзимысла тайкӧ му пырыс мунӧ. Вылас эз лысьт видзӧдлыны Ӧртьӧмыдлы.