МӦС ВИДЗӦМ ЙЫЛЫСЬ

Настукыд ичӧтдырйиыс ёна мӧстӧ видзлывліс ас коддьӧмъясыскӧд. Полой доръясӧ вӧлі гоз-мӧдлаӧ биасясны. Гажа жӧ нин: коді пес ваялӧ, коді печенча пӧжалӧ, коді мыйкӧ пуӧ, коді вермасьӧ. Ёна жӧ чӧскыд сэні пӧжалӧм картупельыд, рудзӧг няньыд и. Оз-оз да коркӧ мӧсъяс дінад уськӧдчыласны, кор ӧти, кор мӧд: пышйӧмысь видзӧны. Лунтыр оз ланьтлыны: гыӧны, жуӧны гебъяс моз. Мӧсъяс асывнад зіля йирсьӧны, тшыгӧсь ли, мый ли да. Сэсся ӧд рытладорыд, пӧтасны да, кутасны жӧ жӧдзны; баксӧны да писькӧдчӧны гортланьыд. Асланыс быдӧнлӧн аслыспӧлӧс жыннян клёнгӧ. Челядь горзӧны, котралӧны: мӧсъяс чукӧрталӧны. Гӧгӧр лыбас зык, шум: «Гортӧ, гортӧ, Гӧрдань!» «Карта, Сюрук, карта!» «Тайтӧ, Серӧд, тайтӧ!» Недыр мысьт ставныс люзьгӧны-мунӧны гид дорӧ: мӧсъясыс и, мӧс видзысь и.