ГОБ

— Лун-мӧд на, — шуӧ: — чужи-а, тӧдчымӧн нин быдми.

Ӧдйӧн жӧ эськӧ и быдмис гобыд: ӧти вежонӧн пумӧна лои.

— Видзӧдӧй! — ӧтчыд, кылӧ, горзӧ: — «кыдз пу, дас арӧса лекан! вӧсни кока понӧль! коз пу и... Мый тэ дуввидзан, пельтӧм пӧрысь жун?.. Видзӧдӧй, мися. Кодкӧ ті дас луннас ме ыдждаыс вӧлід энӧй?

— Сідз тай... — кӧсйис эськӧ мыйкӧ шуны пожӧм да, гоб чирӧстіс:

— Дас, кызь, ветымын во тані дуввидзанныд, а асьныд век на татшӧмӧсь. Ещӧ ӧд и ышнясьӧны: ми пӧ пуяс. Абу и яндзим?! Тіян арлыднас ме енъюгыд кодьсӧ тупка, тіянлы пом ни пыдӧс оз ло!

— Вылі кӧ лыйлан?.. — кӧсйис кодкӧ бара воча кыв видзны да, гоб бара чавӧстіс:

— Кывзӧй, ӧнісянь ме тіян кодь гутъяс, гагъясыдкӧд ог кут сёрнитны. Коді кужад, видзӧдӧй да нимкодясьӧй менам туӧм, быдмӧмыс вылӧ!

Пуяс нинӧм эз шуны, сӧмын шпыньмуніны, мӧда-мӧд вылас видзӧдлісны да.

А гоб — паськавны да паськавны, дзик пож пасьта лои. Сэсся тай кыдз мӧдіс сісьмыны да сісьмыны... Кык вежон мысьт руп-ропмуні, а тӧлысь мысти сӧмын местаыс коли.