ТӦВ ДУРӦМ ЙЫЛЫСЬ

Мукӧддырйиыс тӧлыдлӧн выныс зэв ыджыд овлӧ. Сэки сійӧ унатор вермӧ ӧтиклаысь мӧдлаӧ нуны. 1804 воын испанечьясӧс ёна повзьӧдлӧма. Кыпӧдчис нем виччысьтӧг да вайис сьӧд кымӧр. Сійӧ кымӧрсьыс, зэр моз, кутіс киссьыны зэв мича шобді. Бӧрыннас сюрс пудысь унджык чукӧртісны.

Тайӧ шобдітӧ тӧлыд, вӧлӧмкӧ, Априкаысь вайӧма, сэті кумыльгаӧн мунігтырйи, нянь йӧртӧдъяссӧ жугӧдлӧма да.

Ыджыд тӧлыд кыпӧдӧ весиг гагъясӧс, бобувъясӧс, лэбачьясӧс, уна мукӧдтор и. Му вывсьыс курыштас, качӧдас вылӧ, дай нуӧ, лэбӧдӧ. Ылӧдз, сё верст сайӧ, сюрс верст сайӧдз нуас да зэрӧн гылӧдас йӧзлы шензьӧм вылӧ.

1806 воын Германияын зэрӧма ракъясӧн.

1841 воын Швецияын час-мӧд кымӧрсьыс чери киссьӧма. Ӧтилаті дзикӧдз тырӧма черинас. (Дерт, сійӧ кулӧм чери нин вӧлі.) Гагъясыд да лягушаясыд ловйӧн усьлӧны. Лёк ыджыд тӧлыд сідзтӧ изъяс быдсӧн качӧдлывлӧ, кӧрт туй машиналысь вагонъяссӧ пӧрлӧдлӧ, карабъясӧс берег вылӧ шыблавлӧма и.

Велӧдчытӧм, пемыд йӧзыд ёна полӧны сэтшӧм тӧвсьыд, зэрсьыд. Чайтӧны омӧльяссянь, енсянь мыжъясысь лоиг.