АРЛӦН НЭМ ПОМЫС

І.

Шоныд гожӧмыд тай коли. Воис уна сикаса мича ар нин. Ар — сійӧ уна пӧлӧс рӧма: виж, гӧрд, лӧзов, руд, веж рӧма. Медуна арыдлӧн, дерт, зарни кодь виж рӧмыс, югыд рӧмыс.

Мыйӧн арыд воис, регыд тай став пуяссӧ, кустъяссӧ, дзоридзьяссӧ и мичмӧдіс мичаысь-мичаӧ. Найӧ весиг гожӧмнас сэтшӧм мичаӧсь эз вӧвны.

ІІ.

Уна пӧлӧс рӧма арыд эськӧ мича да, абу сылӧн мичлуныс дзоньвидза-а. Сійӧ висьӧ, сы вӧсна ӧд сійӧ и чӧв олӧ, гажтӧм да. Лэчыд, кӧдзыд тӧлыд орӧдӧ коньӧрӧс. Лунысь-лунӧ арыд омӧльтчӧ. Со, уна сикаса коръясыс пуяс вывсьыд гылаліны нин, шогсьӧны, юрнысӧ копыртӧмаӧсь да. Дзоридзьясыс нюкыртчӧмаӧсь, му бердас ляскысьӧмаӧсь турунъясыс и.

Арся лэчыд тӧлыс ӧтарӧ лёкмӧ, ӧддзӧ; нетшкӧ да шыблалӧ гожся вӧччан паськӧмсӧ быдманторъясыслысь. Арыс ӧтарӧ гажтӧммӧ, медзэвсӧ сійӧ тӧдчӧ лӧнь рытъясӧ, шонді лэччигӧн. Чӧв-лӧнь, весиг лэбачьяслӧн сьылӧмыс оз кыв. Быдсӧн лэбӧмаӧсь, пышъялӧмаӧсь кӧдзыдсьыд да тшыгсьыд шоныдланьӧ, лунвылӧ. Сӧмын тӧлыс шувгӧ-бувгӧ.

ІІІ.

Синъясыс арыдлӧн руӧн тыри. Сэсся сійӧ бӧрддзис посни арся синванас. Асывсяньыс рытӧдз, мукӧддырйи войбыд бӧрдас палявлытӧг.

Видз и му вевттис ва руӧн, туйяс няйтчӧдіс, кырӧдіс — ветлӧдлыны эз кут шогмыны.

Став рӧм сикассӧ пожъяліс, вушйӧдіс. Мича арсьыд сӧмын нин пӧрысь пӧч коли. Шогапырысь лэбалӧны сы вывті катша-ракаяс, кравзӧны: «Ставыс нӧ, тыдалӧ, кулӧ!»

ІV.

Арыд збыль жӧ регыд кулі. Арся кӧдзыд тӧлыд тай вермис. Шутьлялӧ, кылӧ, шаргӧ тыртӧм муяс вывтіыд, куш пуяс вывтіыд да. Арӧс, шонъянӧс, гортйӧ пуктісны, еджыд дӧрӧмӧн пасьтӧдісны да. Куйлӧ кын еджыд. Медбӧръяысь локтӧны, «кольччы видзаӧн» — шуӧны. Асьныс вашкӧдчӧны: «Кутшӧм мича еджыд дӧрӧмыс!»