«ДЗУЖ!»

(Кужтӧм удж дінӧ эн кутчысь)

«Дивъя кузнечьясыдлы овнытӧ, — мӧвпалӧ ӧти мужик: — сьӧмыд да эмбурыд сідзи и визувтӧ на ордӧ, удж прамӧй абу-а. Велӧдчӧм некутшӧм оз ков ни. Лоӧ, тыдалӧ, кузнеча восьтыны».

Пукалӧ выль дорччысь аслас кузнечаас. Вайисны сылы гӧр дорны кӧрт.

Дорис, дорис дорччысь дай шуӧ кӧрт вайысь мужикыдлы:

— Гӧрйыд пӧ тай, ёртӧй, оз пет.

— Мый нӧ пӧ петас?

— Чер пӧ артмас.

— Дор инӧ, — шуӧ: — черсӧ, пыр жӧ тай ковмывлӧ.

Дорис, дорис дорччысь, — чер эз артмы.

— Пурт, — шуӧ: — вай вӧчам.

— Вӧч! — шуӧ мӧдыс: — колантор и пурт.

Дорис, дорис дорччысь... пуртыд эз артмы.

— Оз пӧ, другӧ, пуртыд артмы.

— Мый нӧ пӧ эськӧ артмас?

— Шыла, колӧкӧ, вӧча.

— Вӧч но! Шылаыс ӧд колантор жӧ.

— Эз, — шуӧ: — зон, шылаыд артмы.

— Мый нӧ эськӧ тэ, бур мортӧй, кужан вӧчны?

— Дзуж кужа вӧчны.

— Дзуж?! — чуймис мужик: — Мый нӧ сійӧн вӧчӧны?

— Со мый, — шуӧ дорччысь: — кывзы да видзӧд.

Дорччысь босьтіс кӧрт колястӧ да донӧдіс, сэсся «дзуж» — ва пытшкӧ сюйис.

— Аддзылін, — шуӧ: — ӧні тӧдан, мый лоӧ «дзужыд»?

Со ӧд кыдзи дорччысьыд кужтӧгыд тшыкӧдіс мужикыдлысь кӧртсӧ, да со мый выйӧдз сійӧс воштіс.