ИЧӦТДЫРСЯ ОЛӦМ

Ичӧтдырся олӧм
Некор дзик оз вун:
Сійӧ — пыр дум вылын,
Оз вун вой ни лун.
Сэкся олӧм — быттьӧ
Уна войся вӧт.
Шогъяс он и тӧдлы,
Медтӧ кынӧм пӧт.
Муяс вылын тулыс:
Вотан чӧскыд куз,
Вӧран шонді улын,
Пӧсялӧмыд сӧдз.
Гожӧм шӧрын: пестан
Видзьяс вылын би,
Купайтчигӧн вартчан — 
Кӧсъян судзны ді.
Корсян гӧна гӧньӧ,
Вотан шома кор,
Шӧйтан лунысь лунӧ,
Юждан паськыд бор.
Ар кӧ воас, видзан
Челядь чукӧр мӧс,
Ньӧти он тӧд мудзӧм,
Биӧ кыскан пес.
Тӧвся кӧдзыд — нинӧм, —
Лунтыр киад дадь...
Рытын брӧд ва пыран,
Ёна видас бать.
Зіля корсян паччӧр,
Босьтан нӧдан кыв...
Пӧрысь пӧчлысь мойдӧм
Он нин помӧдз кыв...
Велӧдчыны кутан — 
Школа лоӧ горт,
Нига вылысь корсян
— Чибӧ, сильӧ, морт...
Кытчӧ, зарни олӧм,
Кытчӧ колин тэ?
Некор сэтшӧм пӧра
Ог нин аддзыв ме...