ВОК КОТЫР

Олӧны-вылӧны вит вок. Шуӧны найӧс «чуньясӧн». Вок котыр пыр орччӧн олӧны. Сӧмын ӧти, меддорсаыс, неуна ылынджык олӧ. Сэсянь сылы мукӧдыс ставныс лӧсьыда тыдалӧны. Сійӧ налӧн медыджыд вокныс, нимтӧны сійӧс Певйӧн. Ичӧтджык вокъясыс кӧ петасны уджавны, Пев петӧ налы отсасьны. Ас кежаныс оз кужны уджавнысӧ, вельмӧмаӧсь да. Ёна жӧ ӧд муса налы ыджыд вокныс. Медічӧт вокыс быд отсасигӧн сылы ӧтарӧ копрасьӧ. Тайӧ отсасьысь вокыс абу ӧд и торъя ыджыд тушанас, кызджык сӧмын эм-а. Мӧд вокыс Певсьыс кузь, сійӧс нимтӧны Водз чуньӧн. Буракӧ, сідзи нимтӧмаӧсь быдлаӧ медвойдӧр водзмӧстчӧмысла. Кодсюрӧ, шмонитӧм кузя, сійӧс шулӧны чӧскыд вомӧн. Чӧскыдторъястӧ видлытӧм-чуньышттӧмыд ӧд оз жӧ и кольлы сылӧн. Коймӧд вок — Шӧр чунь. Сійӧ медкузь тушаа. Сы понда, тыдалӧ, сійӧ ыджыдӧ пуксьыштӧ: сійӧ новлывлӧ кӧрт шапка. Дзик ныр вылас шлапкас дай шуӧ. «Чуньлыс пӧ пукті».

Пев кӧ да Водз чунь ем босьтасны, Шӧр чунь шапкаасьӧ нин, ропкигтырйи: «Тайӧяс пӧ ещӧ, мокасьтъясыд, синтӧ перъясны.» Куимнан вокыс грамотнӧйӧсь, радейтӧны гижны. Водз чунь медъёна мырсьӧ, перӧтӧ личкалӧ; мукӧддырйи бумагатӧ розьӧдас, чернилатӧ войтӧдас и. Нёльӧд вокыд ичӧтик тушаа том зон. Сійӧ велӧдчӧм йылысь ньӧти оз тӧждысь, пыр котравны видзӧдчӧ, чунькытша.

Омӧля эськӧ сійӧ отсасьӧ вокъясыслы да, найӧ оз пыдди пуктыны, оз лӧгавны. Нимтӧны сійӧс Нимтӧмӧн.

Витӧд вокыс — Чаль. Сійӧ дзик нин немтор оз кер, выйӧдз мӧдарӧ йылӧн жель оз бергӧд. Вокъясыс сійӧс кага туйӧ и пуктӧны, оз весиг дӧзмывны некор. Зэв бура вок котыр олӧны, зыктӧг-косьтӧг.