ВЫЛЬ ОЛӦМ ДОРЫСЬЯС

Шонді кодь галстука ичӧтик войтыръяс
Мунӧны сикт кузя тыр.
Юръясныс вылынӧсь, сьылӧны мичаа...
Мунісны кытчӧкӧ дыр.

Воисны местаӧ, мӧдісны уджавны,
Сьӧлӧмсянь вӧчӧны удж.
Пуктасъяс весйӧны, потшӧсъяс дӧмӧны, — 
Некод оз пукав тай сутш!

Град вылын, майбырӧй, пуктасъяс воӧны — 
Быдӧн дзик шуӧны: „шань“.
Челядьлысь уджсӧ тшӧтш ошкӧны пӧрысьяс,
Ошкӧ тшӧтш Петырлӧн ань.

Удж бӧрын чукӧрӧн сьылӧмӧн мунісны,
Быттьӧкӧ армия — полк.
Воисны. Мӧдісны чорыда сёрнитны,
Быдӧнлӧн ӧтсяма тӧлк.

Тадз миян быдмӧны выль олӧм тэчысьяс,
Налы ӧд локтӧ на удж.
Виччысьны быдторъяс наысь, дерт, позьӧ нин,
Сӧмын тэ велӧдныд куж.