КУИМ КЫВ

Куим кыв тіянлы, том йӧзлы:
Ӧтувтчӧй, водзмӧстчӧй, велӧдчӧй!..
Ковмас кӧ отсыштны вокъяслы,
Эн повзьӧй, вермасьны лӧсьӧдчӧй!..

Капитал тіралӧ, эралӧ,
Гыжъяссӧ, пиньяссӧ ёсьталӧ.
Син водзас гӧрд вуджӧр вералӧ — 
Му гӧгӧр сявкъялӧ пасьтала.

Йӧлӧга равзӧм шы ыпйӧдлӧ,
Озырӧс лачаӧн кыпйӧдлӧ — 
Мича вӧт вемӧсӧн вӧтӧдӧ:
Вир пиӧ мырсьысьӧс кӧтӧдӧ...

Мырсьысь йӧз, ӧтувтчӧй — ёнманныд!..
Водзмӧстчӧй — культура суанныд!..
Велӧдчӧй — вӧрӧгӧс верманныд!..
Лӧсьӧдчӧй — гӧтовӧсь лоанныд!..

Ставным ми мырсьысь йӧз йитчӧмӧн,
Пӧрысь, том — мӧлӧт, гӧр орччӧнӧн:
Югыдлань, долыдлань тувччалам — 
Выль фабрик-заводъяс вӧчалам.

Куим кыв тіянлы, том йӧзлы:
Виччысьӧй, заптысьӧй, збоймӧдчӧй!
Пиньсӧ мед капитал эз кеслы,
Чукӧстчӧм шыясӧ вӧрзьӧдчӧй!..

Веськыд туй бытшлӧга, лежнӧга...
Водзилань, югыдлань повтӧга!..
Ӧтувйӧн зумыда воськовтам — 
Нюйтмӧма олан сям юковтам!