ЮГӦР

Сайласьӧмӧн, полӧмсорӧн,
Зарни визьяс резігтыр,
Асъя лэбач сьылӧм горӧ
Шонді югӧр петіс — ыр.

Зарни чирйыс лыдтӧм йӧктӧ,
Сюв-сявмунлӧ, вежсьӧ чир.
Лӧзов чирӧс гӧрд чир йӧткӧ, — 
Артмӧ кодзув, быттьӧ вир.

Дзуз-дзезмунӧ, кытштор чужӧ,
Кытшыс ӧшкамӧшка сер.
Кодзув визьыс кытшсӧ вуджӧ — 
Артмӧ мӧлӧт, артмӧ чер.

Югӧр сявкйӧ, кытштор вешйӧ...
Мӧлӧт черлӧн быри пас.
Кыптӧ гӧрд ру, ньӧжйӧ, ньӧжйӧ...
Вежсис — лои корым дас.

Кытшлӧн кругыс водзӧ кыссьӧ,
Югӧр койӧ би зэр — дон:
Тӧдтӧм нига быттьӧ воссьӧ — 
Шур-шармуні лист бок ён.

Кытшыд тірӧ — куслӧ, ломӧ:
Кельдӧ визьяс здукысь-здук.
Югӧр сявкйӧ, ломзьӧ, олӧ — 
Вевттьӧ ӧшкамӧшка круг.

Вой тӧв ышакылӧ ловзис...
Садьмис ойбыр олысь лов.
Син кор лэптіс, ёна повзис,
Бӧрын шуис: югӧр, ов!..

Вӧр-ва тӧвкӧд сёрни босьтіс;
Турун мулы сільгис кыв:
Югӧр выль лун овны восьтіс,
Дыр-ӧ кын эжыс оз сыв?..

Йирка-грима морт нин мунӧ:
Зумыш — чужӧм вылас скӧр.
Бӧрас кок шы, гӧлӧс уна:
Водзӧ!.. Удж татчӧ оз тӧр...