ТУЙӦ ПЕТІГӦН

Шӧпкисны дзоридзьяс меным:
„Видза жӧ колян, бур вок!
Гортсьыд тай томысянь петін — 
Водза-водз кӧвъялін ноп!“
„Весьшӧрӧ, дзоридзьяс, эльтчӧм,
Абу ме лябсалысь вок:
Томӧн кӧ горт помысь петі — 
Бӧрсяньым бӧжӧй оз лок.
Ветла ме, дзоридзьяс, ылӧ,
Саридзын пожъяла кок;
Локта ме уна во мысти — 
Локта ме вежӧра морт.“ — 
Тадзикӧн вашнитіс налы
Нюмъяліг томиник зон.
Нюмвидзис шондіа асыв,
Туй мортлысь кыпӧдіс лов.