САД

Ог вермы синмӧн судзны помсӧ;
Ог вермы сетны гажлысь донсӧ...
Сад шӧрын шойчча... Вывті гажа — 
Зэв мича, пуяс — роч ной гача...
Сэн кудри юра пипу, пелысь,
Зэв тшӧкыд ниа, найӧ чӧлӧсь;
Сэн пожӧм кыдзкӧд шушкӧдчӧны...
Ныв-зонъяс гусьӧн вашкӧдчӧны.
Зэв мича, зарни дзоридз дона,
Сэн сынӧд пӧвстын ворсӧ ёна.
Тан шойччӧ менам муся сьӧлӧм,
Тадз кольлӧ рытъя, гажа олӧм,
Сад пытшкысь кузь рыт ог кӧть петав,
Оз сьӧлӧм сэні менам лемав.
Мем дона чӧскыд сынӧд садйын,
Ме кужа шойччӧг корсьны кадын.
Ме мыйӧн верстак дорысь пета,
Пыр кытчӧ колӧ вынӧс сета:
Ме рытъя шойччӧг корсьны муна...
Сад-йӧрын йӧзыс вывті уна.
Гӧрд рытъя шонді ворсӧ гажа,
Сад шӧрӧ югӧр сявйӧ сӧдза.
Зэв чӧскыд сынӧд пӧвстын шойчча
Пыр гажа-гажкӧд сэні орчча!