ТЫРМЫТӦМ НЯНЬ

Нэмнымӧс гӧрам да кӧдзам,
Дугдывтӧг му вылын жӧдзам...
Сӧмын тай оз судзсьы нянь;
Тырмас кӧ рӧштвоӧдз — шань.
Кӧдзигӧн сьӧлӧмсянь чайтан;
Кок увсянь ныр-вомӧдз няйтчан;
Кватитчан, локтӧ на тӧв — 
Йӧртӧдлӧн тыдалӧ пӧв...
Нимкодя вундан да тэчсян,
Оз узьсьы — пемыднас чеччан...
Муртса на помасяс ар,
Йӧртӧдті быгыльт кӧть шар.
Гожӧмбыд лун и вой пессян,
Ӧзимъяс гӧгӧрыд кесъян.
Тӧкӧтьӧ усьыштас лым,
Няньыд нин йӧртӧдад джын.
Тадзикӧн уна морт шуӧ.
Сьӧлӧмыс нянь вӧсна пуӧ:
Оз пӧ нин помасьлы шог — 
Нянь понда кувны кӧть вод.
Збыльысь ме, ёртъясӧй, гижа:
Пемыдлун дзик ставсьыс мыжа.
Сы понда войтырлӧн мог — 
Весавны кӧйдысысь ёг;
Эн лэдзӧй скӧтнытӧ йӧрӧ;
Став кӧдза плугъясӧн гӧрӧй;
Му бокад писькӧдӧй шор;
Паськыд кӧ — векньӧдӧй бор.
Мый вермад паськӧдӧй муяс,
Косьталӧй матысджык нюръяс.
Весалӧй поноль и мыр — 
Аддзад сэк бур оландыр.
Сиктъясӧд агроном ветлӧ,
Пемыдлун йӧз дінысь вӧтлӧ.
Сы ног кӧ олад и — шань...
Тырмас сэк во вуджны нянь.