ПИЛӦН ПИ

Паччӧр вылын шӧрас,
Паччӧр лабич бӧрас
Кодкӧ тай нӧ дзӧрӧ...
Дзӧрӧ пӧрысь пӧль,
Пӧрысь пӧль зэв гӧль.

Шӧрас паччӧр вылын
Мӧд на кодкӧ кылӧ!
Сэні олӧ-вылӧ
Дзормӧм сера кань,
Сера кань зэв шань.

Тӧв шӧр ӧшинь улын
Пурга стенъяс нюлӧ.
Пӧльлӧн пиян кулӧм;
Ловъя — пилӧн пи,
Сьӧлӧм сылӧн — би.

Быдмӧ войын-лунын,
Сюсь зэв... шензьӧ уна.
Медводз вылын мунӧ...
Мый нӧ кӧть и нэр — 
Медбур пионер!

Паччӧр ӧшинь... гыӧр.
Ывла-н том йӧз гыӧ.
Пӧльлы оз кыв шыыс — 
Пӧльыд пӧрысь нин.
Оз нин аддзы син!

Пӧльлӧн важыс бӧрын:
Тшем сук парма вӧрын,
Пӧсь да синва йӧрын.
Ружтӧ тшыглун, шог — 
Гӧльлӧн чой да вок.

Мый жӧ водзын сылӧн?..
Гу да горт нин кылӧ?
Юрсӧ лэптіс вылӧ
Пӧрысь коми морт — 
Пырис ичӧт ёрт!

Ёсь гӧлӧс кор кыліс,
Ӧшинь гыӧр сыліс.
Шуис пӧльыд сылы:
„Лок жӧ, пиӧй, лок,
Пальӧд менсьым шог!“

Тотш-тотш кайис кылӧ
Пиыд паччӧр вылӧ.
Мойдӧм мӧдіс сылӧн...
Пӧльлы мойдӧ пи,
Мойдыс йи да би...

„Кыдзи сарыд шолис,
Важ олӧмыд кольӧ,
Выль олӧмыс вольӧ
Аслыс мунан туй,
Тальӧ важлысь шуй.

Коммунизмыс локтас,
Начкас сійӧ шогтӧ...“
Сэсся ме и ог тӧд
Дыр-ӧ мойдіс „зон“,
Дыр-ӧ эз вен он.

Пӧльлы оз нин мойдны...
Нимкодясис шойччиг
Пионернас войбыд...
Мойдӧ сӧмын кань — 
Паччӧр видзысь ань.