ТУЛЫС

Тӧкӧтьӧ еджыд лым му вылысь сылі,
Кылалӧ Эжваӧд надзӧник йи...
Шонді нин мӧдӧдчис ветлыны вылі:
Сотӧ да югдӧдӧ, быттьӧкӧ би...

Шоръясті ягсяньыс лым-ваыс ызгӧ,
Быттьӧкӧ тулыслы сійӧ тшӧтш рад...
Ныв-зонлӧн мыльк йылын ворсӧм шы кылӧ — 
Воис тай налы тшӧтш гажӧдчан кад...

Регыд и лунвывсянь шоныд тӧв ыркнитіс,
Сявкнитіс му пасьта енэжсянь зэр.
Трӧпим со телега сарайысь гуркнитіс,
Тима дядь звӧз дорын лӧсьӧдӧ гӧр...

Кыркӧтшъяс вомӧныс тувсов ва паськӧдчис,
Гыясӧн ворсӧдӧ васӧ лун тӧв.
Дядьӧ со вадорті черила мӧдӧдчис — 
Мунігмоз пыж дорын лӧсьӧдӧ тыв...

Сикт гӧгӧр дядьӧяс ид кӧдза гӧрӧны.
Асывсянь рытӧдзыс — мича кузь лун...
„Т-п-р-р-р-у! Тэрмась... бӧрӧзда! — вӧв вылӧ горзӧны:
— Мый нӧ тэ, чокыштчин — бура он мун?!“

Тадзикӧн гажаа тулысын олӧны
Быдлаын, гӧгӧр сэк гажӧдчан шум...
Гажысла челядь и пӧрысь йӧз радлӧны —
Налӧн тшӧтш тулысын вежласьӧ дум...