ПРОЛЕТАРИАТ НОГА КОМИ ГИЖЫСЬЯСЛӦН АССОЦИАЦИЯ

Ӧні пролетариат нога коми гижысьяс ассоциацияын 24 шлен. Гижӧм серти найӧ юксьӧны со кыдзи:

Беллетристъяс — 5

Поэтъяс — 13

Критикъяс — 3

Драматургъяс — 3

Публицистъяс — 5

Тані лыдпасъясыс оз ӧтлаасьны шленъяс лыднас сы понда, мый мукӧд гижысьыс гижӧ беллетристика дай кывбуръяс, либӧ кывбуръяс да драмаяс, либӧ критик дай публицист, сідзи водзӧ. Этша драматургыс миян ассоциацияын дай беллетристыс.

Социальнӧй положенньӧ серти: — рабочӧйяс — абу, крестьяна — 7, служащӧйяс — 17. Велӧдчӧм серти: ичӧт школаса — 12, шӧр школа — 6, высшӧй школаяс — 6. ВКП(б) шленъяс да кандидатъяс — 15, ВЛКСМ шленъяс — 2, беспартийнӧйяс — 7. Мужчина — 23, нывбаба — 1 (этша нывбабаыс).

КАПП ӧткымын школа бердӧ лӧсьӧдіс литература кружокъяс да найӧ уджнас чуйдӧдӧ — ӧні кежлӧ лӧсьӧдӧма квайт литература кружок (Сереговса семилеткаын, Помӧсдінса да Абъячойса том крестьяна школаясын, Изьваса да Сыктывдінкарса мӧд ступеньса школаясын, Совпартшколаын), сэні шленыс — 90–95 морт гӧгӧр. Лэдзӧны ки помысь гижӧмӧн художествоа журналъяс Совпартшколаын да Помӧсдінын.

Сы кындзи „Ордымӧ“ гижӧны унаӧн ӧтувттӧм гижны босьтчысьяс (1928 воын лэдзӧма „Ордымӧ“ гижӧдъяссӧ 26 гижны босьтчысьлысь).