ОШКАНА УДЖ
Вичко весьтын отеч Семӧн тувкис ямщикыслы мышкас:
— Тпру! Он ӧд пӧжар вылӧ тэрмась, мый сідз вӧтлан вӧвтӧ? Он-ӧ мый аддзы — вичко вӧчӧны!
Ямщик зэлӧдіс вӧжжисӧ, сувтӧдіс вӧвсӧ.
Вичко дінын пуӧ удж. Тручка-трачкакылӧны пуяс, жгоньгӧны кӧрт листъяс, ковгӧны мӧлӧтъяс. Вичкосӧ дзоньнас мавтӧны, вежлалӧны ӧшинь рамаяссӧ, пукталӧны выль ӧдзӧсъяс. Ӧтеч Семӧн чеччис доддьысь, сувтіс вичко весьтӧ да паськыда ӧвтчӧмӧн пуктіс вит-ӧ-квайтысь пернапас.
—
— Аддзан, Микайлӧ, енлы эскысь йӧзыд абу ті кодь некрещенӧйяс, дзоньнас со вичкосӧ лӧсьӧдӧны, а ті?.. — ӧтеч Семӧн шеныштіс кинас — весиг ӧдзӧс вуг он тувйыштӧй.
— Ме... да ме... абу ӧд, батюшко, ме сайын... — торксялӧмӧн кыввидзис Микаль, ачыс син гугнас чӧвтліс вичколань. — Ме мый, менам делӧ ичӧт, кыдз мирыс-йӧзыс, батюшко.
— „Мирыс-йӧзыс“, — нерыштіс ӧтеч Семӧн, — а тэ вот воан гортад да ставыслы и висьтав: сідз вот да сідз — православнӧйяс Петрӧ сиктын вичкосӧ пелькӧдӧны, ӧшинь, ӧдзӧс, вевт, — ставыс выльысь-выль, а ми мый керам? Колӧ тшӧтш йӧз бӧрся вӧтчыны. Гӧгӧрвоин?
— Мый эськӧ эг гӧгӧрво да... оз ӧд, батюшко, эскыны менсьым, сӧрӧмӧн шуасны.
— „Шуасны, шуасны“. Оз кӧ эскыны, мед видзӧдлӧны асьныс бур йӧз вылас. А тэнӧ ме бура тӧда, — видны кутіс ӧтеч Семӧн Микайлӧӧс, — вит во пытшкын ӧтчыд вичкоӧ волан, яндысьтӧм син!
Дыркодь броткӧм бӧрын ӧтеч Семӧн ланьтіс. Микайлӧ збоймыштіс:
— Мунам кӧ водзӧ-а, батюшко, пемдам ӧд.
— Вевъялам, ог ӧд тай, мися, пӧжар вылӧ гӧнитӧ, час сёрнитышта православнӧйясыскӧд водзджык.
Вичко дінын, кер чукӧр вылын, пукалӧны морт вит тошка дядьӧяс.
— Чӧлӧм православнӧйяслы, — пуксигмоз шуис ӧтеч Семӧн. — Видзӧда ме ті вылӧ да, сьӧлӧмӧй менам йӧктӧ-нимкодясьӧ. Ӧд сэтшӧм удж котшковтінныд. Сьӧмсӧ нӧ кыдз? Ӧктысинныд?
— Сьӧмсӧ? — нюжӧдіс гӧрд тошка дядьӧ, — сьӧм сюри аскост вотысь.
— Но, но, но, аскост вотысь... Микайлӧ, Микаль, мися, волытӧ татчӧ, волы. Кывзы, мый бур йӧзыс шуӧны. Аскост вот сьӧм вылӧ вичко вӧчӧмаӧсь. А ті лёк некрещенӧйяс моз ӧти ур дон он отсалӧ. Гортӧ воам да, тэ сідз и висьтав. Гӧгӧрвоин?
— Миян ас вот вылад ӧд радио ещӧ лоӧ, а книгаяссӧ шефъяс ыстыны кӧсйисны, — нуӧдӧ водзӧ гӧрд тош, ачыс гусьӧник шпыньялӧ.
— Ра... дио...о... кыдз-сідз радио? — паськӧдіс вомсӧ ӧтеч Семӧн.
— Сідз жӧ. Тайӧ вичкоас клуб лоӧ. Колян собранньӧ вылын став мирӧн шуим. Радио, книга да...
Ӧтеч Семӧн эз нин кывзы, ӧдйӧкодь котӧртіс телегалань.
— Мый нӧ тыра мӧс моз ӧдва вӧран? Кор нин шуа — мунны, мися, колӧ!.. Ӧдйӧджыксӧ нӧ тэ вӧрнысӧ верман али он, — горзӧ ӧтеч Семӧн Микайлӧ вылӧ. — Тадзнад гортад ог и волӧй!
Микайлӧ курччӧма чорыда серамысла уссӧ да бокӧ видзӧдӧмӧн пуксьӧ телегаӧ. Вӧв ӧвтовтіс бӧжнас, сэсся юрнас — телега вӧрзис.
— Микайлӧ, — меліа зургыштіс недыр мысти ямщикыслы ӧтеч Семӧн, — тэ бара... эн жӧ кӧть... эн жӧ, мися, та йылысь висьтав некодлы. Мыйла сэтшӧм йӧйясыслысь уджсӧ пыдди пуктыны. Гӧгӧрвоин?
