КОМИЛӦН УДЖЫС

	Сьӧд мулысь важ еджыд эшкынсӧ вылыссьыс
	Шонділӧн югӧрыс ньӧжйӧник кульыштіс,
	Вольсаліс выль эшкын, веж — 
	Вӧсньыдик, нэриник эж.
	Йӧктыны, йӧктыны петӧй
	Зарниа эшкыныс вылӧ!
	Комияс, кӧдзыд тӧв кулі!
	Чивкъялӧ му вылын тулыс!
	Лӧсьӧдӧй, комияс, гӧръястӧ, пинятӧ,
	Доддялӧй вӧвнытӧ!.. Кӧнӧсь нӧ вӧвъясным?
	Еджыдъяс нуисны вӧв.
	Гӧр бердад пуксьы да лӧвт!
	Зонулов тышкасьны муніс.
	Колины пӧрысь да челядь.
	Велӧдчӧй, аньяс, зон уджӧ!
	— Эн тӧждысь, важӧн нин кужам!
	Шонділӧн югӧрыс быдлаын зарниа,
	Быд муын дзирдалӧ ӧткодя меліа.
	Пӧсьлӧн дук, ньылӧмлӧн кӧр,
	Веж турун, парма и вӧр
	Комиын сорласьӧм ставыс
	Гожся лун югӧрас, жарас.
	Оз тӧдны комияс шойччӧг,
	Тільсьӧны лунсӧ и войсӧ.
	Тонӧ со гӧр юрӧ кутчысьӧм коми ныв — 
	Сылы ӧд дас витӧд ар вылӧ петӧма!
	Кыдз нӧ нин сэсся он гӧр...
	Сэтшӧмнас тырӧма йӧр!
	Кер лэдзӧ, пуръясьӧ аньыд,
	Кыскалӧ турунтӧ, пестӧ...
	Ытшкигад сӧмын нин ӧвтӧ...
	Зорӧдтӧ туг кодьӧс чӧвтӧ.
	Заводӧ ветлігӧн ноп вылас видзӧдлӧй:
	Шег кодь дзик ачыс-а, гид ыдждӧм ноп сылӧн.
	Уна зэв, уна зэв вой
	Мудзысла позявлӧ сой.
	Кынмӧмсӧ-косьмӧмсӧ налысь
	Ог нин кут тіянлы мойдны — 
	Ёнджыка тӧданныд асьныд
	Та йылысь сёрни да басни.
	Ӧтикысь сэзь тӧвся асылӧ кӧдзыд дыр
	Том ичмонь сёрдысь краж вӧлӧм лэччӧдӧ.
	Шыбӧльті додь кутӧ ань...
	Шлытмунӧ шыбӧльыслань,
	Аньыдлы гыпмунӧ пӧрӧ
	Сой вылас краж тыра доддьыд.
	Вит час чӧж куйлас ань сэтӧн...
	Тӧкӧтьӧ лов абу петӧм.
	Пычӧдлӧ краж доддьӧн, пес доддьӧн, кер доддьӧн
	Нылӧс и, зонмӧс и, челядьӧс, быдӧнӧс.
	Сьӧлӧмтӧм вӧр тыра додь — 
	Нач жӧ нин олӧмыс кодь!
	Код тӧдӧ сы йылысь, коді?
	Сы йылысь висьталысь кытӧн?
	Комилысь зільлунсӧ, уджсӧ
	Кодікӧ гижлыныс кужліс?
	Зэв ыджыд копыртчӧм мувывса уджыслы.
	Ставныслы ӧтвылысь колӧ кӧ вӧчлыны — 
	Сы ыдждӧм комилӧн удж — 
	Копырсӧ вӧчны ог куж.
	Уджалӧ лун и вой, тільсьӧ,
	Оз аддзы, оз радейт асьсӧ.
	Удж йывсьыс сьывны ми пондам — 
	Комилысь сьӧлӧмсӧ шонтам...

* * *

	Дзирдав жӧ кодзулӧн,
	Комилӧн удж,
	Сывды тэ шондіӧн
	Мувывса пуж.
	Зільлунным тырмӧ...
	Культура кӧн?
	Важ сёян пыр на
	Нёнялӧ сӧн.
	Чатӧртчы, коми,
	Асьтӧ тэ тӧд!
	Важ сісьмӧм томан
	Сьӧд йирӧ лӧд!
	Гӧрд власьтыд тӧдӧ — 
	Кодарӧ туй, 
	Код оз вӧч сы ног,
	Чужӧмсянь шуй.
	Дзирдав жӧ кодзулӧн,
	Комилӧн удж,
	Сывды тэ шондіӧн
	Мувывса пуж!