СЬӦКЫД ОЛАНДЫР

— Ӧлюк, азя шыдтӧ сёйышт,
Льӧльӧыд ӧд абу.
— Тайтӧным нӧ, мамӧ, кӧні?
— Урадник тай нуис.
— Абу яндзим, озыр барин
Челядьяслысь сёян мырддис...
Озыр йӧзлы лӧсьыд жӧ нин
Дарӧвӧйӧн овны!
— Мамӧ, силюкъясным кӧнӧсь?
(Челядьяс бӧрдӧны).
— Сьӧлӧмшӧръяс, энӧ бӧрдӧй:
Силюкъясӧс земскӧй сёйис...
Озыр йӧзлы лӧсьыд жӧ нин
Дарӧвӧйӧн овны!
Сьӧлӧм висьӧ, гӧгӧр доймӧ,
Жальӧсь посни челядь.
Коньӧр мамлы дум вылас сэк
Нылыс уси.
— Воысь дыр нин менам нылӧй
Абу гортын.
Дугдывлытӧг ёна бӧрдӧ,
Синва лэдзӧ.
Озыр йӧзлы лӧсьыд жӧ нин
Дарӧвӧйӧн овны!
Муртса челядь кадныс кольӧ,
Кватитчан да, рабъяс:
Пияннымӧс сар ньӧбалас,
Нывъяснымӧс барин нуас,
Сӧмын коктӧм, китӧм,
Пӧрысь, кага кольӧ...
Озыр йӧзлы лӧсьыд жӧ нин
Дарӧвӧйӧн овны!
Гӧльлы сьӧкыд, он тӧд шойччӧг — 
Пемӧсӧс моз нартитӧны,
Плетьӧн мышкӧ кучкалӧны — 
„Ойя-ойя“ — горзы сӧмын.
Ёна жальӧсь посни челядь — 
Коньӧръяслӧн абу шудъяс.
Озыр йӧзлы лӧсьыд жӧ нин
Дарӧвӧйӧн овны!
Гӧль йӧз вылын парсалӧны,
Сьӧкыд уджӧн жугӧдӧны,
Вынйӧр, эбӧс бырӧдӧны,
Олӧм кості помалӧны.