КАПП-са ШЛЕНЪЯСЛЫ, ЛИТЕРАТУРА КРУЖОКЪЯСЛЫ, ГИЖНЫ БОСЬТЧЫСЬЯСЛЫ

Ёртъяс!

Тайӧ каднас миян Обласьтын медыджыд уджнас пуктӧма вӧр лэдзӧм. Оз позь вӧр лэдзан уджысь бокын кольччыны тшӧтш коми гижысьяслы. Гижысьяс вермасны сетны ыджыд отсӧг культура уджын кер лэдзысьяс пӧвстын. Тайӧ уджсӧ колӧ нуӧдны сідзи, мед эськӧ вӧр лэдзысьяс быдӧн унджык вӧчисны кер-шпал, дырджык уджалісны вӧрын. Ещӧ нин ёна бура колӧ нуӧдны югдӧдчан уджсӧ вӧр керкаясын „масленича“ дырйи. Та вӧсна КАПП правленньӧ тшӧктӧ быд пролетариат нога коми гижысьлы, литература кружокъяслы, гижны босьтчысьяслы, селькоръяслы вӧчны со кутшӧм уджъяс:

1) Гижавны стенӧ ӧшӧдан газетъясӧ, „Ордымӧ“, обласьтувса газетъясӧ висьтъяс, очеркъяс да кывбуръяс кер лэдзӧм йылысь да кылӧдчӧм йылысь.

2) Отсавны лыддьысян керкаяслы нуӧдны югдӧдчан удж вӧр керкаясын (вӧчавлыны гораа лыддьӧмъяс коми литератураысь, нуӧдны сиктъясын дай делянкаясын сёрнияс вӧр лэдзӧм йылысь, с. в.). Зэв бур лоӧ, коми гижысьяс кӧ да литература кружокъяс наросьнӧ нуӧдаласны сиктъясын дай вӧр керкаясын коми рытъяс вӧр лэдзӧм ёнмӧдӧм могысь (декламация, сьылӧм, мукӧдтор).

3) Ыставны вӧр керкаясӧ „Ордым“ журнал (гижсьыны ас тшӧт вылӧ да; кодлӧн эм коми нига лэдзанінын гонорар, позьӧ сы вылӧ), кыскыны тайӧ уджас мукӧд организацияясӧс да торъя ёртъясӧс, юӧртавны та йылысь „Югыд туй“ газетын.

4) Судзӧдны „Ордым“ вӧр кылӧдысьяслы. Колӧ зільны, мед быд пур вылын вӧлі этша вылӧ нин ӧти „Ордымӧн“.

Коді кыдзи ассьыс уджсӧ нуӧдас тайӧ индӧдъяс серти, юӧртӧй КАПП правленньӧӧ.

КАПП правленньӧын секретар Попов.