БУР КОМИ ПЬЕСАЯС ВЫЛӦ НУӦДАМ КОНКУРС

(конкурслӧн условйӧясыс).

1. Пьеса (драма, кӧть комедия, кӧть опера) мед вӧлі сюрӧснас да тэчаснас выль (оригинальнӧй).

2. Мед вӧлі идеологиянас выль оласногӧ кыскана да петкӧдлӧ ыджыдджыктор олӧмсерыслысь (шуам кӧть, колкозъяс йылысь, енлы эскӧмкӧд вермасьӧм йылысь, выль олан сям лӧсьӧдӧм йылысь, да с. в.).

3. Мед вӧлі гижӧма мича коми художествоа литература кывйӧн (куш агиткаяс оз шогмыны).

4. Мед эз вӧв вывті сьӧкыд пуктыны (обстановка боксяньыс да ворсысьяс лыднас), медым позис ворсны коми сиктъясын.

5. Бурджык пьесаяслы лоӧ сетӧма дас премия (гонорарысь ӧтдор): 1 премия 200 шайта, 1 премия 150 шайта, 2 премия 100 шайта, 3 премия 75 шайта, 3 премия 50 шайта.

6. Конкурслӧн строкыс: 1928 вося декабр 15ʼ лунсянь 1929 вося май 1ʼ лунӧдз. Жюриыс кутас видлавны пьесаяссӧ май 1-я лун бӧрын. Жюриас пырӧны представительяс: Обоносянь — Попов Ӧ., Обкомсянь — Коюшев И., КАПП-сянь — Надеев Ӧ., Коми нига лэдзанінсянь — Оботуров И. да Облитсянь представитель.

7. Пьесаяссӧ, ӧтар лист бокас гижӧмӧн, либӧ машинкаӧн печатайтӧмӧн, ыставны колӧ татшӧм адрес кузя:

Сыктывдінкар, Обоно, коми пьеса конкурс вылӧ. Конкурс йылысь нуӧдны юасьӧм-гижасьӧм Обонокӧд жӧ.

8. Пьесаяс ыставны колӧ кутшӧмкӧ девизъяс улын (оз ков гижысьясыслы ассьыныс ним-овсӧ пасъявны) да тупкӧса торъя конвертӧ тшӧтш колӧ пуктыны гижӧд, кытчӧ пасйыны гижысьлысь тыр ним-овсӧ, девизсӧ да адрессӧ.

9. Туяна пьесаяс, кодъяс оз сюрны премия вылӧ, тшӧтш кутасны босьтсьыны коми нига лэдзанінын печатайтӧм вылӧ, гижысьяслы гонорар мынтӧмӧн.

10. Коми гижысьяслы тшӧтш колӧ зільджыка босьтчыны лӧсьӧдавны коми сьыланкывъяс. Выль (оригинальнӧй) сьыланкывъяс оригинальнӧй мотивъясӧн кутасны премируйтсьыны жӧ. (Тайӧ во гӧгӧр, а не конкурс строкын сӧмын).

Коми Обласьтувса Войтырӧс Велӧдан юкӧд.