БУРАНЬ
Сьылӧмӧн ворсантор важ коми йӧз олӧмысь
МЕДВОДДЗА ВӦЧӦМ
Сцена бокъясас пуяс — вӧр, бӧрас тыдалӧ неыджыд керка, восьса ӧдзӧса, кык ӧшиня. Керка стен бердас сулалӧны комияслӧн важ ӧружйӧяс: шыяс, ньӧвъяс, звер куяс да мукӧдтор. Занавес воссигӧн сцена вылын некод абу.
ХОР СЦЕНА САЙЫН
Кӧн олам ми, сэн сулаліс
Зэв важӧн пемыд вӧр.
Сэн котраліс, сэн гуляйтіс
Кузь сюра еджыд кӧр.
Сэн ош да кӧин шӧйтісны,
Ур чеччавны эз мудз;
Сэн лыдтӧм вӧлі пӧткаыс;
Эз бырлы кӧч да руч.
Сьӧд вӧръяс кузя ветлӧдліс
Звер кыйысь коми морт,
Эз повлы ошкысь, кӧинысь...
Сэн вӧлі сылӧн горт.
Дзор козъяс улын лажыньтчис
Кыз керйысь вӧчӧм чом,
Эз пӧдлась сылӧн ӧдзӧсыс,
Кыдз пӧрысь пӧчлӧн вом.
Лёк плакаясӧн вевттьӧма,
Му джоджа, стенъяс сьӧд,
Кык ичӧт восьса ӧшиня:
Тшын сэті петас мед.
Рытгорув тайӧ чом дорӧ
Том чукӧртчӧма-сь йӧз.
Том войтыр век на гажӧдчӧ,
Кӧть пӧтӧма, кӧть эз.
Петӧны сцена вылӧ нёль ныв да нёль зон, сувталӧны воча, нывъясыс да зонъясыс торйӧн.
ЗОНЪЯС
Зэв ми, нывъяс, мудзим —
Кыйсим ми лунтыр.
Муртса миян ставыс
Эбӧсным эз быр.
НЫВЪЯС
Абу лӧсьыд мудзны
Зонъяслы кӧть кор, —
Бурлак мортлы кыйсьӧм
Прӧстӧй ворсантор.
ЗОНЪЯС
Сідзи, сідзи, нывъяс,
Эм на миян вын:
Прамӧй зонлӧн эбӧс
Кыйсьӧмӧн оз чин.
НЫВЪЯС
Кывзӧй, зонъяс, миян
Рытыс мед оз вош,
Пукыштам да сьылам,
Кыдзи ветлӧ ош.
Ставныс пуксьӧны кытшӧ.
ЗОНЪЯС ДА НЫВЪЯС
Оз некор ланьтлы пемыд вӧр,
Век сылӧн шыыс гӧгӧр кылӧ...
Кӧть усьӧ лым, кӧть киссьӧ зэр, —
Ур кыйысь повтӧг мунӧ ылӧ.
Ур кыйысь, вӧр шӧрын эн вош...
Зэв матын ветлӧ ыджыд ош!
Кӧн вӧрыс тшӧкыд, пуяс кузь,
Пес вӧчысь рытӧдз тільсьӧ сэні.
Эн, зонмӧ, уджалігӧн узь,
Эн вунӧд, мунан туйыс кӧні,
Эн ылав: туйлӧн уна вож...
Зэв матын ветлӧ ыджыд ош!
Дзор тоша ветлысь-мунысь морт
Сьӧд вӧрын козъяс улӧ пуксьӧ.
Сэн абу тэныд шоныд горт,
Сэн дела пукалысьлӧн дзугсьӧ.
Мун водзӧ, восьлав, паськыд тош!..
Зэв матын ветлӧ ыджыд ош!
Рытгорув вӧрын мича ныв
Дзик ӧтнас пожйӧ пувсӧ ӧктӧ,
Оз шогсьы, сьылӧ сьыланкыв,
Кӧть пожйыс омӧля на сьӧктӧ.
Эн тырт, бур нылӧй, ассьыд пож...
Зэв матын ветлӧ ыджыд ош!
Вӧр туйӧд шонді лэччандор
Збой челядь котӧртӧны уна.
Бур пиян, гуляйтнытӧ сёр.
Бӧр гортад ӧдйӧ, ӧдйӧ мунӧ,
Кок тіян пышйӧм вылӧ чож...
Зэв матын ветлӧ ыджыд ош!
Том йӧз дінӧ воӧны дзор тоша кык старик — беддяӧсь, нопъяӧсь. Шапкасӧ пӧрччӧны, том йӧзлы копрасьӧны.
КЫК СТАРИК
Кывзӧй миянӧс, том войтыр,
Кывзӧй, зонъяс, нывъяс,
Кывзӧй ставныд кыкнан пельнад
Старикъяслысь кывъяс.
Ещӧ неважӧн на увсянь
Вывланьӧ ми кайим.
Ӧні сэтысь коми йӧзлы
Ыджыд юӧр вайим.
Кыськӧ том ныв сэтчӧ воис,
Чомйысь чомйӧ ветлӧ.
Сэтшӧм нывсӧ, сэтшӧм мортсӧ
Энӧй на ті тӧдлӧ.
Ветлӧ сійӧ, йӧзлы шуӧ:
„Нинӧмысь эн полӧй;
Кыдзи вокъяс, кыдзи чойяс
Ас костаныд олӧй!“
Шуӧ сійӧ: „Быд морт ӧтмоз
Олӧм вылӧ чужӧ;
Быд морт ӧтмоз сёйны-юны,
Гажӧдчыны кужӧ!“
Ещӧ шуӧ сійӧ сідзи:
„Колӧ мортлы тӧдны,
Кыдзи арся пемыд войысь
Югыдінӧ петны!“
Быдтор бурсӧ сійӧ вӧчӧ —
Помтӧм сылӧн бурыс.
Йӧзыс шензьӧ, кытысь сэтчӧ
Сэтшӧм мортыс сюрис.
Сэні нимыс сылы лои:
„Бурань, зарни нылӧй“,
Сэні коми войтыр костын
Сійӧ олӧ-вылӧ.
Чайтам, регыд Бурань татчӧ
Тіян сиктӧ воас,
Сэки аддзанныд ті асьныд,
Мыйяс тані лоас! (Мунӧны).
ЗОНЪЯС
Кылад, нывъяс, татчӧ
Локтас пӧ Бурань.
Гашкӧ, збыльысь сэтшӧм
Нылыс сійӧ шань.
НЫВЪЯС
Дерт нин, абу ылӧг
Старикъяслӧн кыв:
Омӧльӧн оз овлы
Некор коми ныв!
ЗОНЪЯС
Быдсямаыс эмӧсь,
Ошйысьны оз позь:
Мукӧд нылыс авъя,
Мукӧд вывті ёсь.
НЫВЪЯС
Сідз жӧ позьӧ шуны:
Абу ӧткодь зон,
Мукӧдыслы сӧмын
Киссьӧм кӧч ку дон.
ЗОНЪЯС
Дугдӧй сӧрны, нывъяс,
Ныжмас тіян гыж.
Лучшӧ кытшӧн ворсам,
Кодлы абу дыш.
НЫВЪЯС
Вайӧ ворсам, ворсам, —
Тайӧ медся бур.
Сэсся, гашкӧ, дыр нин
Ворсӧмыс оз сюр.
Ставныс сувтӧны кытшӧн, мӧда-мӧдныслы кияснас кутчысьӧны.
ЗОНЪЯС ДА НЫВЪЯС
Оліс-выліс ворын, оліс-выліс ягын
Эжва дорын удал зон.
Аттӧ, дивӧ-дивӧ, аттӧ, ыджыд дивӧ,
Эжва дорын удал зон!
Усъяс сылӧн лӧсьыд, кудритчӧма юрси —
Прамӧй вӧлі бурлак морт!
Уна ошкӧс сійӧ лэчыд шыӧн сутшкис,
Уна кыйліс еджыд кӧр.
Аттӧ, дивӧ-дивӧ, аттӧ, ыджыд дивӧ,
Уна кыйліс еджыд кӧр.
Уръяс сылы шедіс, ручьяс сылы сюрис,
Кывзіс сійӧс сьӧла-тар.
Аттӧ, дивӧ-дивӧ, аттӧ, ыджыд дивӧ,
Кывзіс сійӧс сьӧла-тар!
Ӧтчыд сійӧ муніс мудер ручӧс кыйны, —
Эз шед сылы мудер руч.
Аттӧ, дивӧ-дивӧ, аттӧ, ыджыд дивӧ,
Эз шед сылы мудер руч.
„Мый нӧ тайӧ лои? Кыйсьӧм эз удайтчы?“
Шуӧ — шензьӧ удал зон.
Аттӧ, дивӧ-дивӧ, аттӧ, ыджыд дивӧ,
Шуӧ — шензьӧ удал зон!
Сӧмын сідзи шуис, видзӧдлас кӧ — локтӧ
Паныд сылы тӧдтӧм ныв.
Аттӧ, дивӧ-дивӧ, аттӧ, ыджыд дивӧ,
Паныд сылы тӧдтӧм ныв!
Тӧдтӧм нылыс мича, тӧдтӧм нылыс авъя,
Абу жугыль, абу тшап!
„Кытчӧ, зонмӧй, ветлін? Висьтав, кодӧс кыян?
Мыйла нинӧмтор он вай?“
Аттӧ, дивӧ-дивӧ, аттӧ, ыджыд дивӧ,
Мыйла нинӧмтор он вай?..
„Ветлі ручӧс кыйны, — бурлак мортыс кайтӧ; —
Эз шед меным мудер руч“.
Аттӧ, дивӧ-дивӧ, аттӧ, ыджыд дивӧ,
Эз шед меным мудер руч!
„Коньӧрӧй тэ, зонмӧй, жалита ме тэнӧ,
Прӧста воши тэнад лун“.
Аттӧ, дивӧ-дивӧ, аттӧ, ыджыд дивӧ,
Прӧста воши тэнад лун!
„Эг ме лунсӧ вошты, — зонмыс вочавидзӧ, —
Сюрин ӧні меным тэ!
Руч пыдди ме тэнӧ, мича нылӧй, кыя,
Любит менӧ, мича ныв!
Аттӧ, дивӧ-дивӧ, аттӧ, ыджыд дивӧ,
Любит менӧ, мича ныв“.
Нылыс оз и повзьы, нылыс оз и пыксьы —
Муса сылы бурлак морт.
Аттӧ, дивӧ-дивӧ, аттӧ, ыджыд дивӧ,
Муса сылы бурлак морт!
Окасисны ёна нылыс удал зонкӧд.
Гортӧ локтіс удал зон.
Аттӧ, дивӧ-дивӧ, аттӧ, ыджыд дивӧ,
Гортӧ локтіс удал зон!
Руч пыддисӧ кыйис, руч пыддисӧ вайис
Аслыс муса мича ныв.
Аттӧ, дивӧ-дивӧ, аттӧ, ыджыд дивӧ,
Аслыс муса мича ныв!
Котӧрӧн пырӧны кык коми морт, ыджыд тошкаӧсь, гӧна шапкааӧсь, повзьӧмӧн ӧвтчӧны кияснас.
ПЫРЫСЬЯС
Ланьтӧй!.. Татчӧ локтӧ
Войпель — ыджыд ен!
Служитысьяс сылӧн
Сьылӧны нин сэн! (Индӧны кияснас, кысянь локтісны).
Ставыс повзьӧны. Нывъяс да зонъяс чукӧртчӧны пельӧсӧ — дугдӧны кытшӧн ворсӧмысь. Вӧрсянь кылӧ гораа сьылӧм, сэсся петӧны сцена вылӧ енлы служитысьяс куимӧн, сьӧд тошкаӧсь, кузь паськӧмаӧсь, лентаясӧн мичмӧдчӧмаӧсь. Найӧ вайӧны кианыс коми енмӧс — Войпельӧс, сувтӧдӧны керка стен бердӧ. Став йӧзыс усьӧны пидзӧс вылас. Енлы служитысьяс Войпель вылӧ видзӧдӧны да сьылӧны.
ЕНЛЫ СЛУЖИТЫСЬЯС
Небесаяс вылын олӧ
Ыджыд Войпель!
Лыдтӧм во нин сэні олӧ
Ыджыд Войпель!
Веськыд кинас шонді кутӧ
Ыджыд Войпель!
Шуйга кинас тӧлысь кутӧ
Ыджыд Войпель!
Мусӧ видзӧ, оз и узьлы
Ыджыд Войпель!
Зэръяс кисьтӧ, пуяс быдтӧ
Ыджыд Войпель!
Коми йӧзлӧн ӧти енмыс —
Ыджыд Войпель!
Коми йӧзлы быдтор сетӧ
Ыджыд Войпель!
Бурджык мортсӧ оз и вунӧд
Ыджыд Войпель!
Лёксӧ вунӧдӧма важӧн
Ыджыд Войпель!
Тэныд юрбитам ми ёна,
Ыджыд Войпель!
Любит, любит коми йӧзсӧ,
Ыджыд Войпель!
СТАВ ЙӦЗЫС (нюжйӧдлӧмӧн)
Войпельӧй-енмӧй,
Миянӧс видз!
Кыдзи ми корам,
Лоас мед сідз!
ЕНЛЫ СЛУЖИТЫСЬЯС
(Кияссӧ нюжӧдӧны Войпельлань)
Кывзы, кывзы коми йӧзсӧ,
Ыджыд Войпель!
Тэныд кевмысям ми ставным,
Ыджыд Войпель!
Звер да пӧтка отсав кыйны,
Ыджыд Войпель!
Кынӧмпӧтсӧ отсав корсьны,
Ыджыд Войпель!
СТАВ ЙӦЗЫС (нюжйӧдлӧмӧн)
Войпельӧй-енмӧй,
Пӧтлунсӧ сет!
Пӧткаяс, кӧръяс
Шедасны мед!
ЕНЛЫ СЛУЖИТЫСЬЯС
Быдтор сетас коми йӧзлы
Ыджыд Войпель!
Оз на шыбит коми йӧзсӧ
Ыджыд Войпель!
Коми йӧзыс абу закуч,
Ыджыд Войпель!
Тэнӧ бурӧдас на ёна,
Ыджыд Войпель!
СТАВ ЙӦЗЫС
Войпельӧй-енмӧй,
Миян дор ов!
Бурӧдам тэнӧ,
Енмӧй, эн пов!
Енлы служитысьяс копрасьӧны Войпельлы, сэсся шуӧны (сьылӧны) пидзикокӧн сулалысь йӧзлы.
ЕНЛЫ СЛУЖИТЫСЬЯС
Чеччӧ, сувтӧ, вокъяс. (Ставныс чеччӧны)
Вот ми шуам мый:
Закуч йӧзлы некор
Бурсӧ ен оз сий.
Юрбитігӧн коді
Нинӧмтор оз вай,
Кевмысьӧмыс сылӧн
Енмӧдзыс оз кай.
Ӧдйӧ енлы вайӧ,
Мыйяс тіян эм,
Сы пыдди ен сетас
Ставныдлы кузь нэм!
СТАВ ЙӦЗЫС
Ваям, дзик пыр ваям,
Енмыс бурмас мед.
Он кӧ енсӧ бурӧд,
Руч ни кӧр оз шед.
Став йӧзыс тэрмасьӧмӧн петӧны, кольӧны сӧмын енлы служитысьяс.
Занавес.
МӦД ВӦЧӦМ
Сценаыс медводдза вӧчӧмын кодьыс жӧ. Войпель водзын, сылы мышнас, сулалӧны енлы служитысьяс куимӧн, найӧ нимкодя шпыньялӧны, кияснысӧ нямрӧдлӧны, сёрнитӧны мӧда-мӧдныскӧд.
ПЕРВОЙЯ (мӧд кык енлы служитысьыслы).
Регыд, вокъяс, аддзам,
Кутшӧм тані йӧз;
Мый ми сылысь корим
Гӧгӧрвоис эз?
МӦД
Ваясны, ме чайта,
Найӧ унатор.
Сетӧмторсӧ босьтны
Некор абу сёр!
КОЙМӦД
Чукӧртам да юксям.
Дела лоас шань!
Сӧмын мед оз волы
На дінӧ Бурань.
ПЕРВОЙЯ
Миянӧс оз повзьӧд
Тайӧ ветлысь ныв.
Вайӧ, вокъяс, сьылам
Енлы ошкан кыв.
КУИМНАНЫС (бергӧдчӧны Войпельлань, сьылӧны).
Ошкам ми енмӧс,
Ыдждӧдлам бурӧс, —
Миянлы енмыс
Куслытӧм би!
Ошкам ми тэнӧ,
Войпельӧй-енмӧй,
Тэ водзын ставным
Челядьяс ми!
Ошкам ми тэнӧ,
Шондіысь югыд,
Став мусӧ видзысь,
Йӧзыслӧн ай!
Ошкам ми тэнӧ,
Войпельӧй-енмӧй, —
Миянлы олӧм
Бурджыкӧс вай!
Пырӧны кыкӧн коми кыйсьысьяс, кианыс вайӧны ур куяс да ӧшӧдӧны Войпель вылӧ.
КЫК КЫЙСЬЫСЬ
Жалиттӧг ми сетам
Енлы комын ур.
Чайтам, ыджыд Войпель
Лоас ӧні бур! (Копрасьӧмӧн вешйӧны бокӧ).
Пырӧ пӧрысь пӧчӧ, вайӧ звер куысь пась да шлавкйӧ Войпель вылӧ.
ПӦРЫСЬ ПӦЧӦ
Тэныд ме, бур енмӧй,
Вайи шоныд пась:
Кӧдзыд кежлад лоас
Новланторйыд дась! (Копрасьӧмӧн вешйӧ бокӧ).
Пырӧны коми мужик да нывбаба, найӧ вайӧны ыджыд мешӧк (мыйкӧ чорыдӧс сюялӧмаӧсь сэтчӧ) да пуктӧны Войпель водзӧ.
ПЫРЫСЬЯС КЫКӦН
Тані, енмӧй, тэныд
Косьтӧм чери яй.
Миянӧс эн вунӧд,
Лӧсьыд олӧм вай! (Копрасьӧмӧн вешйӧны бокӧ).
Пырӧны кык коми мужик да ӧтик нывбаба, кыскӧны муӧдыс ош ку да вольсалӧны Войпель водзӧ.
БӦРЪЯ ЛОКТЫСЬЯС
Тэныд, енмӧй, кыскам
Медся ыджыд ош.
Татшӧм гырысьторйыс
Тэ сайын оз вош! (Копрасьӧмӧн вешйӧны бокӧ).
Пырӧ зэв пӧрысь дядьӧ, вайӧ пеля шапка да юр вылас пуктӧ Войпельлы.
ПӦРЫСЬ ДЯДЬӦ
Муса енмӧй, тэныд,
Кӧть ме мортыс гӧль,
Пеля шапка вайи,
Мед оз кынмы пель! (Копрасьӧмӧн вешйӧ бокӧ).
Пырӧ ныв туисӧн да пуктӧ сійӧс Войпель водзӧ.
ТУИС ВАЙЫСЬ НЫВ
Енмыслы ме ӧкті
Ӧмидз туис тыр.
Гашкӧ, чӧскыдторсӧ
Эз нин сёйлы дыр! (Копрасьӧмӧн вешйӧ бокӧ).
Котӧрӧн пырӧны кык детина, кияснаныс ӧвтчӧны.
КЫК ДЕТИНА
Миян сиктӧ, вокъяс,
Воӧма Бурань,
Сэтшӧм том да мича,
Быттьӧ роч акань!
Енлы служитысьяс букыштчӧны, кианыс босьталӧны кыз бедьяс, быттьӧкӧ виччысьӧны на вылӧ уськӧдчысьӧс. Йӧзыс ставныс ланьтӧны, сулалӧны повзьӧмӧн. Тайӧ каднас пырӧ Бурань, мича том ныв, юр гӧгӧрыс кыӧма дзоридзьясысь кытш, юрсиыс лэччӧма пельпом вылас — лёзь. Сы вылын еджыд платтьӧ, вӧнясьӧма лентаӧн. Морӧсас сутшкӧма гӧрд дзоридз. Сійӧ мунӧ кымынкӧ воськов да сувтӧ, повтӧг видзӧдӧ енлы служитысьяс вылӧ, кодъяс пельпом вылас кутӧны кыз бедьяс.
БУРАНЬ
(петкӧдлӧ кинас Войпельлы вайӧмторъяс вылӧ).
Мый нӧ тайӧ тіян
Чукӧртӧма сэн?
Ош куяс да пасьяс
Корӧ-ӧ мый ен?
ЕНЛЫ СЛУЖИТЫСЬЯС (скӧрысь)
Он кӧ енкӧд юксьы,
Кыйӧмтор оз сюр.
Юксьыштан кӧ енкӧд,
Лоас сійӧ бур!
БУРАНЬ
Босьтӧ-ӧ мый енмыс
Йӧзлысь вайӧмтор?
Босьтӧм вылӧ кисӧ
Чургӧдлӧма кор?
ЕНЛЫ СЛУЖИТЫСЬЯС
Ыджыд Войпель ачыс
Ӧктысьны оз пет;
Служитысьяс сылӧн
Ӧктысьӧны мед! (Кучкалӧны морӧсаныс кулакъяснас)
БУРАНЬ
Ӧктӧмторйыс енлы,
Чайта ме, оз сюр:
Ыджыд Войпель аслыс
Пась ни кӧм оз вур!
ЕНЛЫ СЛУЖИТЫСЬЯС
(матыстчӧны Бураньлань, ӧвтчӧны бедьяснас
да скӧра сьылӧны)
Нинӧм тэныд сӧрны,
Вӧрысь петӧм ныв!
Миянкӧд эн вензьы,
Курччы ассьыд кыв!
БУРАНЬ
Ог ме кывйӧс курччы,
Тіянысь ог пов.
Унаторсӧ, вокъяс,
Босьтавны оз ков!
ЕНЛЫ СЛУЖИТЫСЬЯС (зэв скӧрысь)
Вешйы, мун, лёк нылӧй,
Тупкы паськыд вом!
Он кӧ дугды сӧрны,
Вӧчам тэныд пом!
БУРАНЬ
Асьныд дугдӧй кыны
Йӧзлы черань вез!
Оз на эновт-шыбит
Менӧ коми йӧз! (Петкӧдлӧ кинас йӧзлань).
СТАВ ЙӦЗЫС
Повтӧг быдтор висьтав,
Кывзам ми, Бурань!
Тайӧ тэнад кывъяс
Ставыс гӧгӧр шань!
ЕНЛЫ СЛУЖИТЫСЬЯС
(шыбитӧны бедьяснысӧ, скӧрысь бергӧдчӧны йӧзлань)
Йӧйминныд ті ставныд!
Мывкыд тіян кӧн?
Коді такӧд ӧтув, (петкӧдлӧны Бурань вылӧ).
Виас сійӧс ен!
Йӧзыс ланьтӧмӧн видзӧдӧны муас.
БУРАНЬ (серампырысь)
Татшӧм виысь енмыс
Некӧн эз на чуж.
Ыджыд Войпель весиг
Сёрнитны оз куж! (Ӧвтыштӧ кинас Войпельлань).
ЕНЛЫ СЛУЖИТЫСЬЯС (кияснас шлапкӧдчӧны)
Аттӧ, дивӧ, кутшӧм
Омӧль тайӧ ныв!
Кыдзи сійӧ лысьтӧ
Шуны сэтшӧм кыв!
БУРАНЬ
Шуа ме, мый тӧда,
Висьтала, мый эм,
Кыдзи верма, йӧзлысь
Югдӧда юр вем.
ЕНЛЫ СЛУЖИТЫСЬЯС
(кияснысӧ нюжӧдӧны Войпельлань)
Войпель, ыджыд енмӧй,
Тайӧ нывсӧ ви,
Сы вылӧ тэ ысты
Небесасянь би!
БУРАНЬ
Бияс оз на ысты
Пуысь вӧчӧм ен.
Видзӧдла ме, часлы,
Сылӧн выныс кӧн.
Оз кӧ сійӧ ӧні
Асьсӧ ачыс видз, —
Векысянь ті йӧзсӧ
Ылӧдланныд сідз!
Ӧдйӧ локтӧ Войпель дінӧ да тойыштӧ сійӧс кинас. Войпель швачкысьӧ-усьӧ муас. Енлы сьылысьяс повзьӧмӧн лэптӧны кияснысӧ вылӧ, да сідзи и сулалӧны.
БУРАНЬ (йӧзлы)
Аддзанныд, бур йӧзӧй,
Нинӧм мем оз ло!
Ещӧ на ме ола
Уна-уна во!
СТАВ ЙӦЗЫС
Аддзам ми, Бураньӧй,
Тэнӧ би эз сот,
Некӧн эз на чардышт,
Кымӧръяс эз пот!
Енлы служитысьяс скӧрысь уськӧдчӧны Бурань вылӧ: ӧтик чабыртӧ сійӧс киӧдыс; мӧд лӧсьӧдчӧ сійӧс сутшкыны пуртӧн; коймӧдыс лӧсьӧдчӧ сӧтны черӧн.
ЕНЛЫ СЛУЖИТЫСЬЯС (лёк гӧлӧсӧн)
Виам тайӧ нывсӧ,
Вундам сылысь юр,
Сювсӧ ставсӧ лэдзам,
Водзӧ мед оз дур!
Йӧзыс уськӧдчӧны енлы служитысьяс вылӧ.
СТАВ ЙӦЗЫС
Огӧй на ми сетӧй
Тіянлы Бурань!
Асьныд татысь мунӧй,
Ылӧдчыны шань!
Мездӧны Бураньӧс енлы служитысьясысь. Найӧс шошаӧдныс тойлалӧны сы дінысь сцена сайӧдз.
ЕНЛЫ СЛУЖИТЫСЬЯС
(найӧс тойлалігӧн да сцена сайын)
Ёрӧ, ёрӧ татчӧс йӧзсӧ
Ыджыд Войпель!
Бурӧс налы оз нин сетлы
Ыджыд Войпель!
Синъяс, пельяс налысь тупкас
Ыджыд Войпель!
Кияс, кокъяс налысь косьтас
Ыджыд Войпель!
Лёкмас, скӧрмас, оз нин бурась
Ыджыд Войпель!
Ёрӧ, ёрӧ татчӧс йӧзсӧ
Ыджыд Войпель!
БУРАНЬ (йӧз пытшкын)
Ёрӧй, оз на тірав
Коми йӧзлӧн лов.
Кодлӧн юрыс югыд —
Ёрӧмысь оз пов!
СТАВ ЙӦЗЫС (матыстчӧны Бураньлань).
Асьным ми, Бураньӧй,
Кисьтам налысь вир,
Вӧтӧдам да виам
Найӧс пырысь-пыр!
БУРАНЬ
Энӧ, вокъяс, вӧчӧ
Ракаяскӧд кось.
Ловъя мортӧс вины,
Ме ногӧн, оз позь!
СТАВ ЙӦЗЫС
Тэ ногӧн мед лоас,
Кывзам тэнсьыд кыв.
Пукалышт да велӧд
Йӧзсӧ, зарни ныв.
Йӧзыс бӧрыньтчыштӧны Бурань дінысь, сійӧ пуксьӧ Войпель сулаланінӧ.
БУРАНЬ
Мый ме висьтала, кывзӧй, бур вокъяс,
Кывзӧй ставныд ті пӧрысь и, том.
Кӧть и личкӧны миянӧс шогъяс,
Коркӧ воас ӧд шогъяслы пом.
Ӧні ошъяс моз вӧрын ми олам,
Пемыд ош гу кодь ставнымлӧн горт.
Коді мудерджык, сыысь ми полам,
Коді яндысьтӧм, сійӧ и морт.
Енлы — Войпельлы юрбитам ёна,
Сылы ваялам, мый миян эм.
Чайтам, Войпельлы гӧснечыс дона,
Сысянь виччысям шуд да кузь нэм.
Нинӧм Войпельыс сетны оз вермы,
Сысянь виччысьны нинӧм оз ков;
Сійӧ некор оз бурмы, оз скӧрмы,
Небеса вылын сійӧ оз ов.
Коді аддзыліс Войпельсӧ синмӧн?
Сэтшӧм мортыс, бур вокъяс, оз сюр.
Сӧмын ӧктысьӧм миянлы инмӧ,
Сӧмын сійӧ и енсяньыс бур.
Дугдӧй, войтыръяс, нинӧмысь повны:
Войпель абу, дай некор эз вӧв.
Колӧ мӧд ногӧн, выль ногӧн овны,
Колӧ мӧдарӧ бергӧдны тӧв.
Миян ки, вокъяс, миянӧс вердӧ:
Кор ми уджалам, кынӧмным пӧт;
Кор ми дышӧдчам, сэки кӧть бӧрдӧ, —
Войпель миянлы сёйны оз сет.
Вайӧ чукӧртчам, ӧтувтчам, вокъяс.
Коді ӧтувтчӧ, сійӧ и ён.
Ӧтув вермамджык бырӧдны шогъяс,
Ӧтув олысьлы ыджыдджык дон.
Вайӧ лӧсьӧдам, вокъяс, бур олӧм,
Вайӧ югдӧдам ассьыным юр,
Вайӧ шыбитам сьӧлӧмысь полӧм:
Полысь мортлы бур олӧм оз сюр.
Коді югыдлань тувччыны полӧ,
Сійӧ пемыдысь некор оз пет.
Омӧль мортъяскӧд водзсасьны колӧ,
Омӧль мортъясыс бырасны мед!
Мед жӧ ыджыдӧ некод оз пуксьы,
Мед оз лӧсьӧдлы миянлы гез.
Долыд олӧм мед миян оз дзугсьы,
Мед оз шогсьы, оз бӧрд коми йӧз.
Пемыд юръяс мед ставнымлӧн югдӧ,
Кыдзи югъялӧ шондіа лун.
Гӧснеч Войпельлы сетавны дугдӧ...
Тайӧ кывъяс мед тіян оз вун! (Чеччӧ места вывсьыс).
Ӧні, вокъяс, ме водзӧ на муна,
Менам ветлӧмлы ылын на пом.
Водзын олӧны коми йӧз уна,
Водзын сулалӧ зэв уна чом.
Колӧ быдӧнлы восьтыны синсӧ:
Мыйла чужӧ да овмӧдчӧ морт,
Кытчӧ мортыслы воштыны вынсӧ,
Кыдзи овны да лӧсьӧдны горт.
Регыд, вокъяс, ме бергӧдча татчӧ,
Сэки висьтала ме унатор...
Мый ме тӧда, мый синъясӧй аддзӧ...
Йӧзсӧ велӧдны абу на сёр.
Локта ме, оз кӧ быр менам кокъяс,
Оз кӧ кынмы том сьӧлӧмын вир.
Олӧй лӧсьыда, чойяс да вокъяс,
Тіян шудыс мед некор оз быр.
Бурань копрасьӧ йӧзлы да ньӧжйӧникӧн мунӧ вӧрлань. Став йӧзыс мӧдӧдчӧны ныв бӧрся — колльӧдӧны сійӧс.
СТАВ ЙӦЗЫС
Эн миянӧс вунӧд, эн шыбит, Бурань,
Тэ мӧдысь на миянӧ волы.
Мый висьталан тэ, тэнад кывъясыс шань:
Ми омӧля ӧніӧдз олім.
Ог вунӧдӧй ми тэнсьыд висьталӧмтор,
Век тӧд вылын кутам ми сійӧ.
Бур олӧмсӧ корсьны кӧть талун, кӧть кор
Ми уськӧдчам ваӧ, кӧть биӧ.
Бур олӧм, выль олӧм да шондіа лун
Сьӧд вӧръясын йӧзыслы колӧ.
Лёк Войпельлы юрбитны некод оз мун,
Лёк Войпельысь огӧ ми полӧ.
Зэв миянлы долыд, ми гажӧдчам зэв:
Тэ миянӧс велӧдны пондін.
Став йӧзсяньыс аттьӧ ми шуам сё пӧв,
Бурань, зарни ныв, югыд шонді!
Бӧръя кывъясыс сьывсьӧ сцена саяс нин. Кор йӧзыс саялӧны вӧрын — занавесыс пӧдласьӧ.
