ЛЁК ЧОЙЯС

Оліс-выліс крестьянин. Сылӧн вӧлі куим ныв. Мӧдӧдчисны найӧ оз вотны. Батьыс и шуӧ: «Кодлӧн вотчан чуманыд медводз тырӧ, сылы ньӧба выль чышъян!». Вотчасны, вотчасны да ичӧт чойлӧн наберушкаыс вит озйӧн и тырӧ, ыджыд чойяслӧн оз тыр. Лэччасны гортас. Батьыс ичӧт чойлы ньӧбас выль чышъян. Аскинас бара каясны вотчыны. Батьыс шуас: кодлӧн пӧ медвойдӧр дозныд тырӧ — ньӧба шушун дӧра. Ичӧт чойлӧн вотчан чуманыс бара медводз тырӧ. Гырысьяс вежавны кутасны, сэсся сёрнитчасны да ичӧт чойсӧ и виасны. Гу перъясны, гуаласны сэтчӧ. Асьныс лэччасны гортӧ. Гортын бать-мамлы висьталасны: ичӧт чойным пӧ кольччис чумансӧ тыртны, нуӧдім пӧ да эз лэччы миянкӧд. Бать-мам виччысясны, виччысясны, ичӧт ныв оз во. «Воши пӧ, тыдалӧ, вӧрӧ». Сэсся жалитыштасны да и вунӧдасны.

Мӧд во тулыснас мунісны вӧрӧд нинкӧм вӧчысьяс. Пуксисны ныв гу вылӧ шойччыны. Ныв гу вылын гум быдмӧ. Шойччигмозыд вӧчисны найӧ гумсьыд пӧлян. Пӧлясьӧны да шензьӧны, гум сьылӧ.

Ми пӧ вӧрӧ мунім

Куим чой оз вотны;

Менӧ чояс виисны,

Кӧдзыд гуӧ сюйисны...

Шензьӧны нинкӧм вӧчысьяс. Сэсся босьтісны пӧлян, мунісны сиктӧ. Пырисны куим ныв ордӧ и висьталӧны: аддзим пӧ вӧрысь гу, гу вылас быдмӧма гум, вӧчим пӧ гумсьыс пӧлян, пӧлян пӧ ачыс сьылӧ. Сэсся пондісны пӧлянӧн ворсны. Пӧлян сьылӧ:

Ми пӧ вӧрӧ мунім

Куим чой оз вӧтны;

Менӧ чойяс, виисны,

Кӧдзыд гуӧ сюйисны...

Кыліс сьылӧм чойяслӧн батьыс да ырс бӧрддзис. Сэсся пӧлян нинкӧм вӧчысь киысь нетшыштіс, джодж бердӧ швачкис — пӧлянысь ныв чеччыштіс, батьлӧн ичӧт нылыс. Батьлы нылыс висьталіс, кыдзи сійӧс ыджыд чойяс вӧрын виисны, гуӧ сюйисны. Бать скӧрмис гырысь нывъяс вылӧ да вӧтліс гортысь ас нянь вылас.