* * *

Менам вӧлі кык милӧй,
Ог тӧд кодсӧ радейтны.
Ыб вӧлӧсьтын кык лавка,
Ог тӧд кодарас пырны...

Енэжас со уна кодзув,
Шондіысь югыд абу.
Лавкаясын уна тӧвар,
Преникысь чӧскыд абу.

Керка вылын уна тьӧс,
Кирпичысь сьӧкыд абу,
Быд лавкаын уна тӧвар,
Роч нойысь дона абу.

Аттӧ тайӧ мисьтӧм ныв,
Менсьым милӧйӧс мырддис.
Аттӧ тайӧ лавочник,
Менсьым сьӧмӧс пӧръяліс.

* * *

Кымӧр локтӧ, кымӧр локтӧ,
Ог тӧд зэрас али оз.
Милӧй локтӧ, милӧй локтӧ,
Ог тӧд пырас али оз.

Кымӧр локтіс, кымӧр локтіс,
Кымӧр локтіс дай зэрис,
Милӧй локтіс, милӧй локтіс,
Милӧй локтіс дай пырис.

Ок, милӧйӧй, милӧйӧй да,
Куслытӧм ӧзъян сиськӧй.
Куслытӧм ӧзъян сиськӧй да,
Рытсёр виччысянторйӧй.

Рытсёр виччысянторйӧй да,
Войся сӧветуйтӧмӧй.
Войся сӧветуйтӧмӧй да,
Асъя колльӧданторйӧй.

Асъя колльӧданторйӧй да,
Лунся думайтанторйӧй.
Лунся думайтанторйӧй да
Ужынтӧг узьтӧдлысьӧй.

Ужынтӧг узьтӧдлысьӧй да,
Ӧбӧдтӧг уджӧдысьӧй.
Ӧбӧдтӧг уджӧдысьӧй да,
Пажынтӧг лунйӧдысьӧй.

Пажынтӧг лунйӧдысьӧй да,
Ӧзйин, ӧзйин дай кусін,
Ӧзйин, ӧзйин дай кусін да,
Любитін дай эновтін.