КИНО
Лавкаӧ пыригӧн син вылӧ уси гижӧд: „Талун лоӧ нардомын кино“. Ме чуйми, мый, мися, бара сэтшӧм киноыс-а? Гашкӧ, мися, покусник нин кутшӧмкӧ локтӧма да. Буракӧ, лӧсьыдтор. Кӧть мед мый, а ветла, сьӧмӧй тай 10 ур на кольӧ.
Зэв кузь кутіс кажитчыны меным тайӧ луныс, некыдз оз помась, сэтшӧм окота видзӧдлыны кино. А кодкӧ, кылӧ, шуӧ: ловъя картина пӧ лоӧ. Ме кывзі, кывзі дай шуи, мися, оз ло ловъя картина, а кино лоӧ. Друг ставныс ньӧбасьысьясыс зэв ёна серӧктісны ме вылӧ, — весиг ме шай-паймуні дай яндзимӧн сэтысь петі. Лэччи клубӧ, а сэтчӧ кутшӧмкӧ тӧчила кодь вугъяс вӧчалӧмаӧсь дай стеклӧ шмак эм. Мый бара тайӧ-а? — мӧвпышті ме. Недыр мысти кутісны бергӧдлыны вугтӧ, а стеклӧыд зэв югыд визьясӧн ломзис. Друг биыд кусі да кутіс миянлы тыдавны гижӧд.
— Со, мися, мый вӧлӧма киноыд, — шуышті ме да видзӧдлі бокӧ.
Сэсся друг йӧзыд визӧбтісны, видзӧдлі да, сэні ме кодь жӧ морт вӧрӧ, сералӧ и быдӧн ӧд. Талӧн, буракӧ, мам ни бать жӧ абу, — думышті ме. — Коньӧр ме кодь жӧ. Нимыс вӧлі сылӧн „Сенька вырви глаз“.
Ёна унатор петкӧдлісны. Вӧлӧсьтас ӧд первой на локтіс киноыс.
Сӧмын талунсянь ме куті тӧдны — киноыд зэв буртор вӧлӧма. Аскинас на мунӧм бӧрас ёна быдӧн сёрнитісны кино йылысь.