СЬӦД РУЧ

Кык вежон нин лӧсьӧдчӧны Вась Педӧр да Микул Вань вӧралан керкаӧ кайны.

Ӧти рытӧ сёрнитӧны найӧ вӧралӧм йылысь. Вась Педӧр шуӧ:

— Кор нӧ мӧдӧдчам вӧравныд?

Микул Ваньыд олассямнас вӧлі ош кодь — вель дыр немтор эз шу. Сэсся кыввидзис:

— Ковмас аски жӧ мунны, йӧзыс шуӧны: миян керка дорын пӧ ветлӧ сьӧд руч.

— Сьӧд руч ветлӧ? — Вась Педӧр быдӧн нюмдіс.

— Да, висьталӧны, сьӧд руч пӧ ветлӧдлӧ, оз кӧ пӧрйӧдлыны.

Вась Педӧрлы зэв колӧ сьӧд ручыд, тэрмасьӧ-вӧрӧ.

— Вай, сідзкӧ, аски мӧдӧдчам: гӧтыръяслы рытнас тшӧктам пусьыны-пӧжасьны.

— Тэ бара водзджык лок, медым некод оз тӧдлы, — шуӧ Микул Вась.

— Бур, бур, Ваньӧ дядьӧ, водз и локта.

Вась Педӧрыд воис гортас, гӧтырыслы шуӧ:

— Баба, вай жӧ ӧні рытнас пусьы да пӧжась. Аски асыв ковмас мунны вӧр керкаӧ.

Гӧтырыс тӧдӧ, нинӧм буртор оз кыйлы сійӧ, да шуӧ:

— Мыйла бара, Педьӧ, мунан-а?! Немтор жӧ ӧд он кый-а, сёянсӧ сӧмын бырӧдан.

Вась Педӧр „курни-верни“ узьыштіс, асывводз чеччис, сёйыштіс, муніс Микул Вань ордӧ. Микул Вань важӧн нин сувтӧма, виччысьӧ Вась Педӧрӧс.

— Вай регыдджык мунам, мед рытъя кыанас воам вӧр керкааным, — тэрмасьӧ Микул Вань.

Кыйсьысьяс лызясисны, понъяс доддялісны, тэчисны сёян-юан, кыйсян кӧлуй, мӧдісны вӧрӧ.

Рытнас кыаыс вӧлі на, воисны вӧр керкаӧ. Пестісны би, тшай пузьӧдісны. Микул Вань сёйигад велӧдӧ:

— Педӧр, тэ капканъястӧ сиавны мунан ю катыд, ме муна ю кывтыдыс.

Вӧр керкаыд Микул Ваньлӧн, Вась Педӧрлы быть лоӧ кывзыны: вермас на ӧд вӧтлыны керкасьыс, он кӧ сылысь кывзы.

— Ме бара кӧть кытчӧ муна, мед сӧмын вӧлі зверыд-а, — шуӧ Педӧр.

Микул Ваньыд вӧлі зэв наян, — Вась Педӧрӧс ыстӧ ю катыд, кӧні зверыс оз ов. Недыр мысти мудер мортыд шуӧ:

— Вась Педӧр, тэ кутан кыйны аслыд, ме бара аслым, кӧть сэсся мый кыям.

— Меным ӧткодь, мед тон быдсӧн бур-а, — оз нин вензьы Педӧр. Тадзи лӧсьӧдчисны кыйсьыны кык ёрт. Асывнас водз чеччисны, сёйыштісны, мунісны капканъяс сиавны. Вась Педӧр муніс ылӧдз, километр дас сайӧ. Звер кок туйыс этша. Вомгорулас аслыс кайтӧ:

— Мыйла татчӧ менӧ Микул Ваньыд ыстіс? Шедны кӧ, эськӧ, шедӧ да, оз кӧ, оз дай... — Капкан вит кымын сиаліс, сэсся бӧр мӧдіс керкаӧ.

Микул Вань важӧн нин воӧма, тшай пузьӧдӧма, шыд пуӧма. Вась Педӧр лазсӧ пӧрччис, пырис вӧр керкаӧ. Микул Вань сералігмоз юалӧ:

— Мый нин, Педӧр, кутшӧма звер кок туйыс эм?

— Кутшӧм, кульыс, звер кок туй? Весиг кӧч кок туйыс абу-а.

— Но-о, кӧч кок туй абу! Оз лӧсяв. Тэ, зон, ылӧдлан! — Вась Педӧр дӧзмискодь:

— Мый нӧ, он эскы!? Чайтан, ме ылӧдла? Ме некодӧс на эг ылӧдлыв, водзӧ ог кӧсйы ылӧдлыны ни.

Микул Вань чукрасьӧ, векшасьӧ, — серавны гора абу лӧсьыд — шуӧ:

— Ме немтор жӧ эг аддзыв, — ачыс эськӧ, тыдалӧ, аддзылӧма да, бара на ылӧдлӧ.

Арся войыд кузь. Микул Вань войтӧ бура эз и узь.

Асыв чеччисны водз, сёйыштісны няньтор, мунісны капканъяс дорӧ. Педӧр зэв жугыля мунӧ, ачыс мӧвпалӧ: оз жӧ ӧд нин немтор шед-а.

Кык капкан видліс, нинӧм абу шедӧма. Коймӧд дінӧ муніс, видзӧдӧ — капканыд абу, кодкӧ нуӧма. Педӧр пондіс вӧтчыны капкан туйӧд. Вӧтчис, видзӧдӧ да, капканад шедӧма сьӧд руч, да вӧлӧм пышйӧдӧ. Педӧрыд бедьнас косьыштіс ручыдлы. Аслыс сьӧлӧм вылас зэв долыд лои.

— Сэсся ӧні муна ме гортӧ, вӧр керкаӧ ог и ветлы. Ӧні ме озырма. Гӧтырӧй кутас радейтны. Меным и ӧні овнысӧ!..Микул Ваньыд ӧд ачыс шуис: торйӧн пӧ кыйсям!..