КЫБИГӦН

Ю йылын, турунъяс пуктігӧн, ёрткӧд
Мӧдӧдчим рытъявыв перйыны пес.
Мӧвпнаным черитор кыйыштны кӧсъям,
Гашкӧ нӧ, шедас на пумӧн-мӧд кӧть.

Удж бӧрын пуксьыштім, сёйыштім шыдтор.
Ывлаыс онькъялӧ — шоныд и лӧнь.
Куритчим, лэччӧдлім пыжаным кӧлуй.
Ю кузьта тэрыба катыштім кӧдж.

Эжваыс лӧньӧма, пасьтала лӧзов.
Кыркӧтшӧ пыжнымӧс сувтӧдім — зур,
Асьным нӧ котӧртім вӧр пытшкӧ песла,
Ошъяс моз перъялам, муркӧдам мыр.

Кыр дорӧ лэччӧдлім, сирӧд пес вӧчим,
Пыжаным сӧвтім да, лои дзик тыр.
Кӧзлаӧс пестім да мӧдӧдчим катыд — 
Черияс ёна сэн жуӧны. Дзурс.

Ком чери сюсьджыкӧн кажитчис меным,
Налимыд, лобдой моз, кыскасьӧ пыр.
Турунаинъясӧ сайӧдчӧ сирыд,
Пукалӧ наяна, чургӧдӧм ныр.

Ывлаыс лӧньӧма, онькъялӧ шоныд.
Весигтӧ пуяслӧн шувгӧм оз кыв.
Посньыдик ёльяслӧн кылыштӧ жургӧм,
Вужъя кост, изъяс кост сяльгыштӧм шы.

Ылісянь йӧла шы нораа кылӧ, — 
Вӧляӧн, сьӧлӧмсянь букӧстлӧ сюзь;
Асъявыв кӧнсюрӧ жыдачлӧн пырксьӧм.
Пожӧм пу кондаӧ таркӧдӧ сизь.