МЕМ ӦТИ АРСЯ РЫТӦ...

Мем ӧти арся рытӧ
Сідз шуис муса зон:
„Ме туйӧ аски муна.
Тэ тайӧ тӧдан он?

Ме муна сэтшӧм муӧ,
Кӧн абу пемыд вӧр.
Дерт, торйӧдчыны сьӧкыд,
Да нинӧмтор он кер!“

Ме бӧрддзи: „Муса зонмӧй!
Эн дзикӧдз менӧ коль!
Ог вунӧд тэнӧ ачым
Кӧть куим во, кӧть нёль!“

Сэк зонмыс менӧ босьтіс
Дай окаліс сё пӧв:
„Ме тэнӧ ог пӧ эновт,
Тэ дона меным зэв.

Мӧд ныв вылӧ ог видзӧд,
Эн шогсьы, сьӧлӧмшӧр.
Ми гажа тувсов лунӧ
Тан ӧтлаасям бӧр!“

Дыр прӧщайтчи ме сыкӧд,
Дыр кывзі мелі кыв:
„Квайт тӧлысь мысти локта,
Сэк виччысь, муса ныв!“

Тадз туйӧ муніс менам,
Том нывлӧн, донатор,
Кыдз мунӧ-дзольгӧ увлань
Веж турун пӧвстын шор.

Ме ӧтнам куті овны,
Пыр артала быд лун,
Кор воас менам мусук.
Оз некор сійӧ вун.

Ме кыдзкӧ ӧти войӧ
Лёк мисьтӧм аддзи вӧт:
Оз быттьӧ зонмыд радейт,
Оз быттьӧ менӧ тӧд.

Ме серӧкті да шуи:
„Мем повны оз на ков.
Оз шыбит менӧ мусук,
Оз метӧг сійӧ ов!“

Пыр артмӧ сэтшӧмторйыс,
Мый мӧвпыштны он куж.
Оз быдмы сэки дзоридз,
Кор усьӧ кӧдзыд пуж.

Лёк вӧтыд менам иніс,
Он нинӧм сыкӧд кер.
Зэв гажа тувсов лунӧ
Том зонмыд воис бӧр.

Бӧр гортас сійӧ воис,
Да абу важ кодь шань:
Тшӧтш вӧлі сыкӧд гӧтыр,
Сьӧд синма мича ань.

Ме бӧрдны эг нин вермы.
Пӧсь сьӧлӧм лои кын.
Йӧз пӧвстысь менӧ аддзис
Лёк пӧръясьысьлӧн син.

Дерт, гӧгӧрвоис сійӧ,
Мен кутшӧм вӧлі шог,
Да ичӧт сылы вӧлі
Важ мусукӧдзыс мог.