ВӦР КЕРКАЫН

(Вӧралысьлӧн висьт)

Ичӧтысянь ме зэв ёна ветлывлі вӧравны, кыйлывлі уна сикас прӧмыс: уртӧ, сьӧдбӧжтӧ, тулантӧ, быдтор. Ӧтнам вӧрӧ ветлігӧн быдсяма местаад — ваинад, нюръясад, косінад, ягъясад волывлі. Зэрӧ кӧть шляча арнад, кытчӧдз оз пемды век шӧйтан. Пемдас да, кытчӧ войыс суас, сэні и лоӧ узьны. Узьлывлі коз улын, узьлывлі и вӧр керкаясын. Оз тай небось полӧмыд овлы, дерт, эськӧ шуштӧмджык жӧ мукӧддырйиыс да, быдторсӧ жӧ мӧвпалан, унатор дум вылад усьлӧ. Мӧвпыштла вӧлі мукӧддырйиыс батьлысь висьталӧмсӧ, коркӧ кодкӧ сы дінӧ вӧр керкаын сибавлӧма да, бура дыр он унмовсьы, быттьӧкӧ унмыд кытчӧкӧ пышйӧма.

Ӧтчыд вӧр керкаын узигӧн и ме дінӧ тшӧтш кодкӧ сибаліс. Со кыдзи сійӧ вӧлі: рытнас сёрӧнкодь нин вӧр керкаӧ вои. Пӧрччыси, пес кералі, пачсӧ ломтышті да ӧшӧді ужын пуны. Пусигкостіыс кульышті лунся кыйӧм уръяссӧ. Сэсся ужнайті. Бура дыр лои менам олӧмыд. Водігӧн понйӧс тшӧтш ас дінӧ чукӧсті. Водӧм мысти мудзӧм мортыд пырысь-пыр чорыда унмовсси, быттьӧ лайкйӧдлыны кутісны, сэтшӧм чӧскыда узя. Друг тай узигӧн кодкӧ гӧна кузь гыжъя киӧн кабыртіс чужӧмӧс, быттьӧ синмӧс кӧсйӧ перйыны. Ун йывсьыд рисниті-пукси. Видзӧда да, боксянь кодкӧ нюжӧдӧ мелань гӧна чужӧмсӧ. Ме ывлаӧдз бырскӧбті, ачым тірала повзьӧмла, быттьӧ кӧдзыд ваӧн юр вывсянь кокулӧдз кисьтӧны. Ӧдзӧс порог вывсянь судзӧдчӧмӧн корси лабичысь истӧг, шарскӧбті би.

Коді, мися, сибалі татчӧ, вай пет да мӧдысь эн лок.

Ньӧжйӧник пыри. Вӧлӧмкӧ, юр водзын кӧлуй джаджйын вӧлӧма лёкиник гӧн тыра чуман. Сійӧ чумантӧ понйӧй лапанас кыскӧма да меным чужӧм вылӧ шляпкӧма-уськӧдӧма. Гӧныд киссьӧма. Кос чуман дорышыс гыжйыштӧма менсьым чужӧмӧс, сійӧн и менам чайтсьӧма кузь гыжъя да гӧна кинад. Бӧрыннас сэсся понйӧй вӧлӧм ныр-вомсӧ вайӧ ме дінӧ, мед ме ог дӧзмы сы вылӧ, мед ме ог нӧйт, а ме сійӧс повзьӧм йывсьыд узян синад сибалысьӧн чайті. Со ӧд и мыйысь верман повзьынытӧ полысьджык сьӧлӧма мортыд.

Ӧзті сартасӧ би, бура дыр пукалі-куритчи, мӧвпалі. Водӧм бӧрын асылӧдзыс сэсся эг нин садьмыв. Ӧні ме сы бӧрын ог нин пов ни ог эскы некодлы.