ПӦРЪЯЛІС
Быдми зэв жеба. Тушаӧй водзӧ оз и сод. Дас кӧкъямыс арӧса нин вӧлі-а, тушаӧй век на гыр судта.
Нывъяс менӧ оз радейтны, или пони^Ичӧт./^ туша вӧсна или мыйкӧ мукӧдтор вӧсна — ог тӧд. Эз радейтны да и сӧмын.
Ёна эськӧ нывъяс бӧрся ветлӧдлі да, нинӧм оз артмы. Весиг оз сёрнитны мекӧд. Кутшӧм нин омӧль вӧлі миян сиктын Вась Лида, весиг и сійӧ оз кӧсйы ветлыны мекӧд, оз сёрнит ни. Ну, а ме ӧд абу жӧ дзик шыбитана зон, ме и ачым на ог кӧсйы сэтшӧмъясыдкӧд ветлыны. Бур нылӧс окота мусукӧ босьтны.
Вӧлі миян Ганов Мань. Мыйсӧ ме сы водзын эг вӧчлы, кутшӧма эг укаживайт сы бӧрся — оз радейт дай сӧмын. Нинӧм ог вермы вӧчны!
Скӧрми ме сэсся, шогсьыны куті. Ог сёй, ог ю, войяс ог узьлы. Казяліс менсьым шогсьӧмӧс Паш Педя, шуӧ:
— Эн шогсьы. Габов Маньыд лоас миян!
— Да кыдз нӧ вермас сідз лоны? — гажми ме весь.
— А сідз вот, лоас да и сӧмын. Тэ Матрӧн бабатӧ тӧдан?
— Тӧдтӧг ӧд ог ов, — шуи ме Педьлы.
— Вай тэ ветлы талун жӧ рытнас сы ордӧ, тэнӧ сійӧ велӧдас нывтӧ смилитны.
Шонді лэччӧм бӧрын мӧдӧдчи Матрӧн баб ордӧ. Вои. Висьталі, мый понда ме сы ордӧ локті. Сетіс меным кутшӧмкӧ кабала, шуӧ:
— Тайӧ кабаласьыс гижӧдсӧ тэ бура велӧд. Велӧдан кӧ да кужан вӧчны, Манькаыд лоас тэнад.
Кабала вылад сеті бабалы ӧти шайт сьӧм. Вои гортӧ да и куті велӧдны. Кабала вылас со мый вӧлі гижӧма:
„Емва ю йылын, ылысь-ылысь сиктъяс дорысь, выйим ыджыд ді, ді вылын сулалӧ ыджыд кыз пожӧм, пожӧм вужъяс горулын эм пес плака, плака горулын эм ыджыд шог, медым Мань шогсис и ёна кутіс шогсьӧм вӧсна радейтны кувтӧдзыс. Сідз жӧ Мань моз и тэ эн вунӧд, кут бура радейтны нывсӧ“.
— Ог нин бара вунӧд, медым сӧмын кутас менӧ Мань радейтны-а.
Гажми ме весь тайӧ лыддьӧм бӧрын. Ну, ӧні и смилита...
Велӧді ме тайӧ кывъястӧ да и мӧді гуляйтны. Унаӧн ныв-зон чукӧртчӧмаӧсь, Мань сэні жӧ.
Матыстчи Мань дорӧ. Сьӧлышті бокӧ куимысь, понді вомгорулын нимкыв лыддьыны. Маньыд и казяліс.
— Мый нӧ тэ йӧз дорас тадзи сьӧласян? — юалӧ менсьым.
Ме ёна повзи: кӧсйи тӧдлытӧг, гусьӧн вӧчны-а, йӧзасис.
— А сідз тай, куритчи да эз мозді табак тшыныс... — Кӧсйи ылӧдны.
— Мый, мый тэ, Митрей, шуан?.. Куритчыны али мый нин кӧсъян велӧдчыны?.. — кутісны юасьны менсьым зонъяс. А ме некор эг куритчыв. Заводитісны ме вылын ваксьыны. Зэв меным лои яндзим, кӧть пышйы на дорысь.
— Тайӧ еретникасьны, буракӧ, кӧсйӧ, — кутісны сёрнитны нывъяс. Ме дорысь ставыс муналӧны, пышъялӧны. Коли ме ӧтнам, весиг Паш Педьыд тшӧтш муніс.
— Паш Педь кӧ и висьталӧма том йӧзыслы-а?...
Видзӧдны куті, а Паш Педь век ӧтлаын Манькӧд. Скӧрми ме сэсся да бӧр мӧдӧдчи гортӧ.
Жаль лои Матрӧн баблы сетӧм деньгаӧй, да бӧр он кор.
— Пӧръяліс менӧ Паш Педь, пӧръяліс и Матрӧн баблӧн нимкывйыс.
