ЫЛӦДІС МОРТТӦ

Асывводз. Омлялӧ, шутьлялӧ кӧдзыд вой тӧв. Ышмас да, пом сылы абу. Туй шӧрӧ джуджыда тэчӧ толаяс. Моздорас босьтас небыдик лымсӧ, качӧдас вылӧ, быд ногыс гартас, сэсся шелӧдас кытчӧкӧ ылӧ.

Туй кузя кӧнӧвал мунӧ. Еджыдӧдз тыртӧма лымйӧн. Бӧрас кыскӧ „пу кока вӧв“^Дадь/^.

— Со трустӧ, поводдя, — шуӧ. — Дзик нин кынми-а, сиктыс кӧн на. Морыд тай юсьылас кыськӧ... Юрӧй кӧ оз вӧлі вись, эг жӧ нин эськӧ татшӧм лёкнад туяд пет.

Недыр мысти мыччысис сикт. Сэсь кыза путшкӧ сьӧд тшын.

— Ме чайтлі, мися, ог нин во, — кынма. Бара на тай ловйӧн коля!..

Медводдза керка дорас лэдзасьӧмаӧсь шойччыны зэв уна вӧла.

— Пырыштла татчӧ. Дерт, тайӧ вина катӧдӧны.

Пырис. Шойччысьяс пиысь аддзис тӧдсакодь мортӧс. Гусьӧник юалӧ сылысь:

— Кытчӧ нӧ ветлӧмныд, зонъяс?

— Котлассянь вина катӧдам.

— Гашкӧ и вузавны эм да?

— Менам, зон, абу. Со, Педӧрлӧн эм, кык четверт, ас вылас босьтӧма, катӧдӧ.

Кӧнӧвал шпыньмуні:

— Педьӧыд меным важысянь сват. Тӧдӧмысь менсьым пӧкмеллятӧ веськӧдас, — мӧвпалӧ аслыс.

Матӧджык Педь дінӧ пуксис. Сёрниӧ воисны: сідз да тадз...

— Коді, — шуӧ, — вӧлӧн вежсьысь тіян пиысь эм?

Педьӧлы нырас пыр тшукис. Вӧв сылӧн эз вӧв зэв бур. Кӧнӧваллысь вӧвсӧ тӧдӧ, колян во ӧтилаын карын шойччисны да.

— Вай мекӧд вежсям.

— Кӧні тэнад вӧлыд? — юалӧ кӧнӧвал.

— Со тай, кузь бӧжа Серкоыс. А тэнад нӧ век на важ вӧлыд?

Кӧнӧвал вашъялӧ: — Сійӧ, дерт, он ӧмӧй тӧд?

— Но, кыдз нӧ ог тӧд, тӧда. Карей вӧв?

— Сійӧ, — шуӧ кӧнӧвал. Аслас эськӧ даддьыс кындзи нинӧм абу.

— Уна-ӧ нӧ эськӧ содтан? — юалӧ Педьӧ.

— Ме содта?.. Тэныд?!. Мый нӧ тэ, зонмӧ!.. Вежсьӧм кӧ дум вылад эм, кутам вай збыльысь сёрнитны, — скӧракодь шуӧ кӧнӧвал. — Со веськыд ки тэсянь содтӧд — вит парта вина да, шуам кӧть, сьӧмӧн дас шайт.

Педьӧ ыджыда ышловзис. Винаыс, буракӧ, мортыдлы жаль.

— Мый тэкӧд вӧчан. Вит парта вина да вит шайт сьӧм сета.

— Лӧсьыд и сідзи. Сӧмын менсьым бур вӧвсӧ бура видз. Ок, вӧлыс ӧмӧй вӧв! Оз ков, майбыр, сылы плетьыд, додьтӧ век разьӧ.

Педьӧ вина да сьӧм клоп пуктіс пызан вылӧ.

Недыр мысти юраныс мӧдіс жувгыны тӧв.

Педьӧӧс босьтісны ёртъясыс серавны: вӧлыс пӧ кӧнӧвалыдлӧн зэв лёк. Лыыс да куыс пӧ сӧмын нин кольӧма. Педьӧ зэв шогӧ воис.

— Вай, — шуӧ, — бӧр вежсям вӧвнад.

Кӧнӧвал сійӧ и виччысьӧ: вина коляссӧ пӧръявны колӧ.

— Вай вит парта содты, колӧкӧ, бӧр вежся.

Педьӧ содтіс бара вит парта, босьтіс бӧр ассьыс вӧвсӧ. Лунтыр юисны Педьӧлысь винатӧ.

— Мый ещӧ эг ылав ассьым Серкоӧс тэнад мерлина вылӧ сетны, — аслас вежӧрыс вылӧ нимкодясьӧ Педьӧ.

Ф. Некрасов.