ОЗ ТАЙ МУДЗНЫ

Шонді со быгыльтчис слудаяс сайӧ,
Тырмас нин ытшкыны турунтӧ, вок.
Ва вывсянь полігмоз вывлань ру кайӧ,
Пу вылын асылӧдз ланьтӧма кӧк.

Чом дінын ытшкысьлӧн пусьӧма шыдыс,
Сёйисны, юисны, водісны пыр.
Сӧмын тай бур нылӧс босьтӧма шудыс:
„Иванӧс мусукӧс эг аддзыв дыр“.

Сӧмын на мӧвпыштны удитіс нылӧ,
Иванлӧн гудӧкыс ловзьӧдіс вӧр.
Регыд тай кокъясыс юавтӧг ылӧ
Нуисны, бытьӧкӧ яранлӧн кӧр.

„Бурсиӧм мусуклы, радейта овны!“ —
Ылісянь локтігмоз горӧдіс ныв, — 
„Гажтӧмла сёянтор дугдіс нин ковны,
Пуксьы да ӧдйӧджык горӧдлы кыв.“

Шы ни тӧв гӧгӧрбок, узьӧны ставыс,
Быттьӧ и муыс ӧд узьӧ тшӧтш сэк,
Сӧмын тай вылісянь ю кузя ваыс
Дугдывтӧг сяльӧдчӧ, сёрнитӧ век.