КЫМЫН ПЕРЕМЕНАӦН МУЯС УДЖАВНЫ БУРДЖЫК

Важысянь нин ми шуам: куим переменаӧн уджавны оз туй. Сідз уджалӧмӧн муыд сӧмын омӧльтчӧ, изӧрмӧ. Сэсся куим переменаӧн уджалігӧн кӧдзсьӧ сӧмын мортлы сёянтор — сю да ид. Скӧтлы кӧрым вылӧ некутшӧм кӧдза пуктасъяс сэки оз вӧдитны.

Агрономъяс шуӧны: куим переменаӧн муяс уджалӧмысь колӧ дугдыны. Колӧ лӧсьӧдны сэтшӧм уджаланног, медым муяс сетісны нянь дай скӧтлы бур кӧрым. Сэки скӧтыд бурмас, овмӧсад докод содас. Сідзкӧ, колӧ корсьны типӧвӧй севооборот, коді эськӧ туйис Сыктывдін уезд кузя. Типӧвӧй севооборот йылысь и ме кӧсъя тані сёрнитыштны. Типӧвӧй севооборот колӧ лоны:

Медым позис уджавны миян (этша на) муяс вылын.

Мед сэтчӧ сюысь да идйысь кындзи кӧдзсис нӧшта картупель, мӧс сёркни да бобӧнянь турун. Колӧны ыджыд докод сетысь да мусӧ вынсьӧдысь, бурмӧдысь кӧдза пуктасъяс. Мед муясысь ыджыдджык докод воис. Татшӧм севооборотсӧ и позьӧ бӧрйыны типӧвӧй севооборот пыдди.

Миян тані муясыд этша, гектар джынсянь гектарӧдз йӧз овмӧс вылӧ сӧмын воӧ. Этша му вылад, дерт, ёна уна, шуам, ӧкмыс переменаӧн уджавны лоӧ дзескыд.

Сідзкӧ, миянлы колӧ босьтны типӧвӧй севооборот пыддиыд нёль перемена либӧ вит перемена.

Войдӧр видзӧдлам Норфольскӧй ногӧн нёль переменаӧн уджалӧм. Сэні кӧдзаясыс вежласьӧны со кыдзи: ӧти переменаын — викаӧн кӧдзӧма коськӧм, мӧдын — сю, коймӧдын — картупель да мӧс сёркни, нёльӧдын — ид либӧ зӧр. Тадзи уджалӧмӧн куим переменаӧн уджалігӧн дорысь докодыс эськӧ и ыджыдджык нин воӧ, сӧмын ёна ыджыд пӧльзасӧ сетны оз на жӧ вермы. Сэні со бобӧняньыд абу, вывті уна картупель (уна картупельтӧ крестьяниныд оз пукты). Сэсся нӧшта викаа коськӧмыс, а мед коськӧмыд вӧлі бур, колӧ тыртӧм коськӧм лӧсьӧдны да арын либӧ водз тулысын гӧрны.

Сідзкӧ, тайӧ (Норфольскӧй ногса нёль переменаыд) типӧвӧй вылад оз туй. Босьтам мӧд сикасӧс — Ярославса нёль перемена. Тайӧ эськӧ бурджык да сэні корнеклубнеплодыс абу, дай абу жӧ прибыльнӧй.

Медся бур лоӧ Дояренкоса вит перемена.

Со кыдзи сэні кӧдзаясыс вежласьӧны:

	1 перемена	2 перемена	3 перемена	4 перемена	5 перемена
1 во	коськӧм	сю	картупель, 1 вося бобӧнянь	2 вося бобӧнянь, картупель	ид либӧ зӧр.
2 во	сю	1 вося бобӧнянь, картупель	картупель, 2 вося бобӧнянь	ид либӧ зӧр	коськӧм
3 во	картупель, 1 вося бобӧнянь	2 вося бобӧнянь, картупель	ид либӧ зӧр	коськӧм	сю
4 во	картупель, 2 вося бобӧнянь	ид либӧ зӧр	коськӧм	сю	1 вося бобӧнянь, картупель
5 во	ид либӧ зӧр	коськӧм	сю	картупель, 1 вося бобӧнянь	2 вося бобӧнянь, картупель
6 во	коськӧм	сю	1 вося бобӧнянь, картупель	картупель, 2 вося бобӧнянь	ид либӧ зӧр
7 во	сю	картупель, 1 вося бобӧнянь	2 вӧся бобӧнянь, картупель	ид либӧ зӧр	коськӧм
8 во	1 вося бобӧнянь, картупель	картупель, 2 вося бобӧнянь	ид либӧ зӧр	коськӧм	сю
9 во	2 вося бобӧнянь, картупель	ид либӧ зӧр	коськӧм	сю	картупель, 1 вося бобӧнянь
10 во	ид либӧ зӧр	коськӧм	сю	1 вося бобӧнянь, картупель	картупель, 2 вося бобӧнянь

Тайӧ 10 воӧн бергӧдчана вит перемена.

Таысь бур переменатӧ (севообороттӧ) миян условиеяс серти огӧ аддзӧ. Тайӧ скӧтлы сетӧ бур кӧрым, пӧльзаыс (докодыс) муысь унджык воӧ дай.

Видзӧдлам, ёна-ӧ бурджык дояренкоса вит переменаыс ярославса нёль перемена сертиыд.

Пример вылӧ босьтам 5 гектар му. Нёль перемена тамда му вылын сетӧ докод (идзассӧ лыддьытӧг):

Сю	(125 пуд. 2 шайтӧн пуд) 250 шайт дон.
Ид	(100 „ 1 ш. 80 ур. пуд) 180 „ „
Бобӧнянь	(225 „ 40 урӧн пуд) 90 „ „
Став докодыс кайӧ	520 шайт дон.

Дояренкоса вит перемена сетӧ:

Сю	(100 пуд) — 250 шайт дон.
Ид	(80 „ ) — 144 „ „
Бобӧнянь	(180 „ ) — 72 „ „
Мӧс сёркни, картупель	(1200 п. 30 урӧн пуд) 360 шайт дон.
Став докодыс	776 шайт дон

Условнӧй прибыльыс вит переменаӧн уджалігӧн воӧ нёль переменаысь серти 256 шайтӧн унджык. Дерт, тайӧ абу стӧч: ми урожайсӧ вит переменаӧн уджалігӧн пуктім нёль перемена дырйи кодьӧс жӧ, а вит перемена дырйи муыс бурджык лоӧ, урожайыс ыджыдджык воӧ.

Ме ногӧн, дояренкоса вит перемена тані лоӧ медбур, сійӧс и колӧ бӧрйыны типӧвӧй севооборот пыдди.

Агрономлӧн отсасьысь В. Латкин.