ТУЛЫС

Лунвывсянь тӧкӧтьӧ тӧврутор пӧльтыштӧ,
Войланьӧ шоныд ру вайӧ.
Шондіыс бара нин гожся моз гажӧдӧ, — 
Гажа кад быдӧнлы вайӧ.

Юясысь йиясыс важӧн нин кывтӧмась — 
Кытчӧкӧ морелань ылӧ.
Пӧткаяс унаӧн локтісны лунвылысь,
Сьылӧмыс наяслӧн кылӧ.

Пуяслӧн коръясыс котӧрӧн быдмӧны;
Шондібан, мичаӧсь, вежӧсь.
Тулысса рытъясӧ сьылӧны-ворсӧны
Томджык йӧз чукӧрӧн сёрӧдз.

Сиктъясысь войтырыс кӧсйӧны петавны
Гӧравны-кӧдзавны муяс.
Мичаа-джуджыда, шондібан, быдмӧны
Арсяпом кӧдзаяс-сюяс.

Лӧсьыд жӧ, гажа жӧ овнысӧ быдӧнлы
Тулысся шондіа кадӧ.
Тӧвся моз войтырыд абу нин жугыльӧсь,
Сьӧлӧмыс быдӧнлӧн радлӧ.