«БУРДӦДІС»

І.

Маръяӧс суӧма шог. Ӧти пи и вӧлі, дай сійӧ висьмӧма. Коксӧ вӧрзьӧдны оз лысьт, сэтшӧма пыктӧма пидзӧсыс.

— Зэв жӧ ӧд, Педьӧ, тэ асныра. Кымынысь шулі: эн кыскась сарайясӧд да потшӧсъясӧд. Он кывзы мамлысь... Лоӧ веськӧдчысьла ветлыны, — шуӧ Маръя.

Педьӧ никсігтырйи лэччис пӧлатьысь. Кок пӧв йылас чеччалӧмӧн муніс лабичӧдз. Синваыс бан пасьтаыс лэччӧ. Буракӧ, ёна жӧ нин кокыс доймӧ.

Маръя ыстіс верӧссӧ веськӧдчысьла. Кырулын вӧлі олӧ пӧрысь пӧчӧ, Сень Миш Мить гӧтыр. Вӧлі сійӧ ичӧтик тушаа, лёзь юрсиа, зэв гырысь да сьӧд бугыльяса. Уналаын Сень Миш Мить гӧтырӧс тӧдӧны. Быд вежон сы дінӧ волӧны морт кызь «бурдӧдчыны». Воӧны Шожымсянь, Отсянь, Пальсянь, Зӧвсьӧртсянь, Межӧгсянь... Зелля сылӧн тырмас, бырӧмысь оз пов. «Бурдӧдӧ» быдсяма висьӧмысь. Пинь висьӧмысь тшӧкаад кӧрталӧ зыртӧм кушман. Кынӧмыд кӧ висьмас, зэв жарын пывсьӧдас, скипидарӧн зыралас, бӧрыннас зэв ёна лукӧн вердас. Чужӧмад кӧ петасны мыльяс, тшӧктас вайны куим юкмӧсысь ва, сійӧ ванас мыськалас ӧбразъяс, пызан пельӧсъяс да, сійӧн и мыссьӧдас висьысьтӧ. Уна ногӧн на сійӧ вӧлі «бурдӧдӧ» йӧзтӧ.

ІІ.

Тӧдысь пӧч видзӧдліс Педьлысь коксӧ. — Збыль, шуӧ, кытчӧкӧ вӧрзьӧдӧма.

Батьыс мамыскӧд кутӧны Педьӧӧс лабичын. Пӧчӧ нетшкӧ, быд ногӧн песлалӧ коксӧ. Педьӧ лёк горшӧн горзӧ.

Час кымын сідзи дойдалісны Педьӧӧс. Кокыс дойдалӧмысла нӧшта ёна пыктіс. Пидзӧс гӧгӧрыс быдӧн лӧзӧдіс.

Рытнас сэсся пывсян ломтісны. Зэв на дыр дойдалісны. Войнас Педьӧлӧн кокыс зэв ёна кутіс висьны.

Лун-мӧд Педьӧ помала горзіс. Коксӧ сылысь кутіс бӧрйыд кӧрны. Батьыс Педьӧлӧн зэв ёна повзис.

— Вермас ӧд дзик коктӧм лоны зонмыд. Аски, гашкӧ, Маръя, Педьӧтӧ лоӧ карӧ нуны да?

Педьӧ дойдалӧмсьыд зэв нин ёна вӧлі полӧ да, карад некыдзи оз мун. Дыр пыксьыны эз жӧ лысьт, батьыс зэв скӧр вӧлі да. Нуисны Педьӧӧс больничаӧ. Больничаын шуисны Педьӧлысь коксӧ пилитны. Батьыс эз сет пиыдлысь коктӧ пилитны, бӧр нуис гортас.

Ёна дыр Педьӧ висис. Во вит мысти кымын эськӧ и дугдіс кокыс висьнысӧ да, сӧмын чукыльтіс бӧрйыд. Кокыс эз кут нюклясьны. Ветлыны зэв сьӧкыд лои. Ӧти кок йылас, коньӧр, чеччалӧ. Лӧсьӧдісны сылы кык бедь. Киняувъясас босьтас бедьяссӧ да сідзи и ветлӧ. Со ӧд кыдзи «веськӧдісны» коктӧ мортыдлысь.

Эз кӧ эськӧ «веськӧдны» — ӧні вӧлі кока. Кокыс сылӧн эз вӧрзьӧмысь вись. Абу ӧд дивӧ челядьыдлы висьмыныд, тулысбыд лымйын, ваын, няйтын кӧмтӧг келаласны да.

Некор оз ков мунны Сень Миш Мить гӧтыр кодь «бурдӧдчысьяс» дінад: найӧ немтор оз тӧдны, сӧмын йӧзсӧ тшыкӧдӧны.