ДЕЛЕГАТКАМарпа велӧдчытӧм вӧсна Шогсис бура уна во. Мем пӧ велӧдчытӧм мортлы Бур олӧмыд оз нин ло. Гижны-лыддьысьны эз кужлы Оліс шога вель нин дыр. «Лоас овны пемыд мортӧн,» — Тадзи аслыс кайтіс пыр... Гырысь йӧзлы пемыд сиктӧ Восьтіс школа сӧвет власьт. Марпа велӧдчыны босьтчис — Сылы велӧдчӧмыд масьт. Тӧвбыд велӧдчис зэв бура, Эз коль прӧста ӧти лун. Марпа велӧдчыны юра: Кор мый кывлас — оз нин вун. Комын арӧн пӧ эг чайтлы Воссиг ассьым пемыд син... Пемыд олӧм оз нин кайтлы, — Бура гижны кужӧ нин. Ӧні Марпа — делегатка, Аньяс пӧвстын медся збой. Пессьӧ коми аньяс пӧвстын, Оз ӧд ланьтлы лун ни, вой.
