ИЗНЫ НЕКӦН ВӦЛІ...
Лунтыр шливгис посньыдик арся зэр. Муыс потӧма нин, оз сӧдзӧд ас пытшкас васӧ. Туйяс вылын гежень моз гудрасьӧ няйт. Пуяс вылысь киссьӧма корйыс — ставныс пӧрысьмӧмаӧсь.
Няйт туй кузя, ӧшӧдӧм юрӧн, быттьӧ исалӧ водзӧ туй, мунӧ пӧрысь вӧв. Кык кӧлесаа телегаын куйлӧны вит векньыдик мешӧк. Кӧльӧсаяс шатласьӧны, швачкӧдчӧны, горзӧны — пӧрысьмӧмаӧсь жӧ. Телегаӧс кутыштігмоз шочиника помалӧ ыджыд броднияса, ар кызь вита кымын морт. Зэлыд дукӧс сойяссӧ зэлӧдӧмаӧсь тшупӧдъясӧн сӧнъясыс, чужӧмыс косіник — тӧдчӧ вын. Гуранъясті мунігӧн кутыштлӧ телегасӧ, мед эськӧ гезйӧн кардъялӧма телега паличьясыс эз киссьыны. Юрсӧ вӧв моз жӧ ӧшӧдӧма да шогысь мыйкӧ мӧвпалӧ.
— Олан-вылан, Павел! — горӧдіс Кӧсьта, олӧма, гӧрд тошка мужик, локтӧма дзик Павел дінӧ да.
Павел дышиника чатӧртіс юрсӧ, кисӧ чургӧдіс да видзис воча кыв. Мед аслас вежӧралӧмтор йылысь сёрни панны, сувтӧдіс вӧвсӧ да юаліс:
— Кытчӧ нин мунан чернад да лазнад?
— Мӧсъясӧс Наста абу аддзӧма да, муна тай корсьны. Ӧні ӧд ёна ошкӧсь да, ӧстатки мӧсъясыд травитчасны. Вой-лунсӧ тай каттям мӧсъяс бӧрся вӧтлысигӧн!
Найӧ сулалӧны ичӧтик ю пос вылын. Тайӧ ю йывсьыс и мӧвпаліс Павел локтігас. Ю сераліс зэр тусьяс улын, визувтіс ӧдйӧ.
— Ме вот весьшӧрӧ каття лун-войсӧ. Ветлі мельничаӧ изны нянь. Горш понмыдкӧд он на вермы лӧсьӧдчыны — эз из. Мыйкӧ лӧгасьӧма — чушъялӧ змей моз. Тӧндзи писӧ лавкаӧ приказчик вылӧ бӧрйӧны вӧлі да, ме паныд сулалі, кыкысь кыв босьтлі. Ёна эськӧ зятьясыс да сватъясыс кӧсйисны да, эз вермыны сюйны ассьыныс мортсӧ. Сыысь кӧ эз из-а, мыйкӧ тай пыр ӧтитор броткӧбтӧ-а: «Ог, ог. Мун бӧр гортад».
Павел гӧлӧс лыбӧдыштіс да нуӧдны кутіс водзӧ сёрни:
— Джын няньтӧ ӧд миянлысь босьтӧ мельникыд. Абу, дерт, лӧсьыд да мый сэсся керан — мельничаыд мӧд абу — бара лоӧ сэтчӧ лажзьӧдны, аскур пуны да, кевмысьны... Тайӧ ю вылас аслыным колӧ мельнича вӧчны, — юр пыркнитӧмӧн шуис.
— Ме важӧн нин сёрнитлі мужикъяскӧд да, полӧны — век ассьыныс пыкӧдсӧ пуктӧны: оз пӧ артмы дай ог пӧ вермӧ вӧчны, — шуӧ Кӧсьта.
— Вермам, сӧмын сьӧлӧмӧн колӧ кутчысьны удж дінас-а. Медводдза удж — тӧдмавны, дона-ӧ сувтас изки да мыйта ковмас вештыны мастерлы. Сійӧ висьтавлыны крестьяналы да тӧвнас жӧ кутчысьны удж дінас.
_______________
Шор моз визувтӧны керъяс шлюз вывті. Сатшкӧдчӧны черъяс. Бикиньяс моз чеччалӧны чагъяс. Ыпйӧдлӧ пемыда му. Дзижгӧны стружъяс. Шабді кудель моз гартчӧны, чиклясьӧны стружкияс.
Веж ласта вылын еджыд мӧсъяс моз куйлӧны изкияс. Кыптӧ струб, вочасӧн тырӧ муӧн. Ю лёкысь бузгӧ, быгзьӧма, тыдалӧ, лӧсьыдджык вӧлӧма прӧстасӧ кань моз чиклясьныс.
Абу сьӧлӧм вылас воӧма Епрем Митрейлы. Абу окота киссьӧм мельничасӧ эновтныс да, кер бунтсӧ сотны заводитліс, изкисӧ чер тышӧн тышкавліс, поткӧдны кӧсйис. Сват зятьыскӧд нӧйтлісны Павелӧс лёкысла... Нинӧм эз вермыны вӧчны. Ӧтувъя мельнича сиктсянь кык верст сайӧ сувтіс, торйӧдіс Епрем Митрей мельничашойысь йӧзӧс, бырӧдіс мельниклысь озырмӧдчӧмсӧ йӧз озырлунӧн.
М.
