«КУЖЛІС КЫПӦДНЫ ЛОВТӦ»

Ӧні, уна во кольӧм бӧрын, казьтыштам Василий Дмитриевичӧс да окота лоӧ пыр и шуны: сыкӧд ӧтлаын уджавны вӧлі лӧсьыд и гажа — кужліс кыпӧдны ловтӧ. Артист — мӧд кыв сэсся бурджыксӧ ог и аддзы, мед сійӧс лючки-ладнӧ донъявны. Меным шуд усис сыкӧд уджавны гижысь Котыр правлениеын 70 воясын. Ме вежӧрӧн и сьӧлӧмӧн пыр кылі сылысь кӧсйӧмсӧ — озырмӧдны да паськӧдны коми культура да коми литература. Выль, том сьывны-йӧктыны кужысьясӧн да гижысьясӧн. Сы дырйи лои восьтӧма гижысь Котыр бердын художественнӧй литературалысь пропаганда бюро, кӧні сьӧлӧмсянь заводитісны уджавны миян том гижысьяс — Коля Белых да Юра Ионов. А налы пыр отсасисны олӧмаджык гижысьяс — Иван Изъюров, Иван Вавилин, Серафим Попов — да и Коми книга лэдзанінын уджалысьясыс. Василий Дмитриевич кужліс ышӧдны олӧмаджык и томджык гижысьясӧс аслас шмонь да бур кывъясӧн. Гижысь Котырлы Василий Дмитриевич сяммис судзӧдны машина-легковушка. Эз вӧв Коми му пасьтаын грезд ни сикт, медым коми гижысьяс эз аддзӧдчывны сиктса лыддьысьысьяскӧд и школаын челядькӧд. Сійӧ каднас жӧ миян войвывса каръясын — Воркутаын, Интаын, Ухтаын — лои восьтӧма литобъединениеяс, медым миян гижысь Котыр бердӧ ыштӧдны роч гижысьясӧс. А сы кад кежлӧ нин миян быдмис-сӧвмис гижысьяслӧн выль поколение. Гашкӧ, и Геннадий Фёдоровлӧн, Василий Юхнинлӧн да Ананий Размысловлӧн быдтасъясыс — Иван Торопов, Пётр Шахов, Владимир Попов, Альберт Ванеев, Юрий Васютов, Геннадий Юшков. Сійӧ кадӧ эз бырлы йитӧдыс и москваса роч гижысьяскӧд, и мукӧд союзнӧй республикаса войтыркӧд. Тшӧкыда волісны миян Коми муӧ сэтчаньса гижысь гӧсьтъяс. Лыддьылісны кывбуръяснысӧ, бур кылӧн казьтылісны и коми гижысьяслысь уджъяссӧ. Сійӧ кадӧ уна коми гижысьлӧн нин петаліс книга роч кыв вылын москваса «Современник» да «Детскӧй литература» издательствоясын. Бур йитӧдъяс вӧліны и украинаса да белоруссияса гижысь ёртъяскӧд. Бӧръя кадас олӧмыс ёна вежсис, тӧдчымӧн чинісны коми грездъяс, комиӧн сёрнитысьяс да лыддьысьысьяс. Но век жӧ коми литератураыс олӧ да вылӧ, сӧвмӧны-быдмӧны на коми челядьыс. Локтӧны выль вынъяс миян коми литератураӧ. Радейтана коми журнал «Войвыв кодзулӧ» ыстӧны уджъяссӧ нывкаяс да зонкаяс. Журналас тшӧкыда паныдасьлӧны томъяслӧн лӧсьыдик кывбуръяс да висьтъяс. Лыддян найӧс, да ловнад ловзьылан, окота лолӧ и аслыд комиӧн сёрнитыштны.