КРЕСТЬЯНИН ПИ, КОМИ ПОЭТ

Серафим Алексеевич Поповлысь нимсӧ, кыдзи коми поэтлысь, ме тӧдлі ичӧтсянь нин. Но сыкӧд медводдза аддзысьӧмыс лоис сӧмын квайтымынӧд воясын нин, кор верӧсӧс вуджӧдісны уджавны Совнархозӧ да воимӧ овны Сыктывкарӧ.

Льӧмъюын медводз и аддзысимӧ. Сійӧ кадас Льӧмъюыд вӧлі зэв тӧдчана места карса олысьясыдлы. Профсоюзъяс сэтчӧ лӧсьӧдӧмаӧсь карса войтырлы шойччан Керка. Лун дас кежлӧ сетлісны путёвка. Мунны абу ылын. Теплоход часӧн и катӧдас Льӧмъюӧдзыд. Шойччы-купайтчы, кӧть пет да пув-тшак вот, вӧрыс тай орчча. Рытнас гажӧдчы, сьыв-йӧкты, верман и гижысьяскӧд аддзысьлыны — сэн жӧ орччӧн и коми гижысьяслӧн Керкаыс.

Менам верӧслы сетӧмаӧсь жӧ сэтшӧм путёвкасӧ, да асъя теплоходнас и воим Льӧмъюад. Окота вӧлі ӧдйӧджык петавны вӧрас да чӧсмасьыштны чӧд тусьӧн. Босьтім ӧти тӧдсалысь кӧрзина дай мӧдім вӧрланьыс. А паныд миянлы кодкӧ зэв тэрыб вӧраса локтӧ. Сьӧд берета, куртка пӧлаыс кизявтӧм да сідзи ӧтарӧ-мӧдарӧ и лэбыштлӧ.

— О, видзӧдлы, Серафим Попов! — горӧдӧмӧн моз и юӧртіс меным верӧсӧй. Воча воысьыд кыліс, дерт, верӧслысь горӧдӧмсӧ да ачыс и первойӧн шыасис:

— Чолӧм, чолӧм вотчысьяслы! Таво вотӧсыс уна.

— А ме тӧда тіянӧс, — шуӧ верӧсӧй. — Ярегаӧ коркӧ волінныд, кывбуръяс лыддинныд. Очерк вӧлі гижӧмныд и. Лыддьылі...

— Да-а? Вӧвлі, вӧвлі Ухтаад и Ярегаад. Ӧні со и Кӧрткерӧссянь локта. Татчӧ гижысьяс дорас кӧсъя кежавны... Но, вотчӧй зіля. Рытнас аддзысьлам. Выль кывбуръяс дасьті...

Та бӧрын ме Серафим Алексеевичкӧд куті тшӧкыда аддзысьлыны. Ме челядьлы да мый да гижышталі нин сэк, пыртлывлі гижӧдъясӧс и «Югыд туй» газетас. Сэк сійӧ сэні и уджавліс.

Менам вежӧрын ӧнӧдз на югыд серпасӧн кольӧма гижысь Котыр правлениеын медводдза уджалан лунъясӧй да сэні нин С. Поповкӧд паныдасьлӧмыс. Вӧлі 1972 вося гожӧм. Сэки Союзлӧн кантораыс буретш меститчыліс Куратовскӧй музейын, шуйгавывса ичӧтик жыръяс. Мӧд лун на и вои выль удж вылад. Бухгалтерша Мария Симоновна пукалӧ нин места вылас. Локтіс и кӧзяинным, Василий Дмитриевич Леканов. Сэк сійӧ вӧлі юралысьнас гижысь Котырын. Шпыннялӧ да шуӧ:

— Но, Нинук, локтін? Ті давай, нывъяс, тӧдмасьӧй да мый да, ме Катьӧ дорӧ мӧд судтаас кайла. Нёрпаліг шусьӧ, да гажӧдышта. Регыд локта, — содтіс петігас.

— Тэ бара-й гажӧдыштан, — шуис Мария Симоновна да чеччис жӧ пызан сайсьыс... Меным пӧ Минфинӧ колӧ ветлыны. Муртса сійӧ петіс, кодкӧ пыр и мыччысис ӧдзӧсас, зэв гора гӧлӧса да, буракӧ, и гажа юра.

— Почему, спрашиваю, не встречают московского гостя?! — пырис джодж шӧрӧдз, зымнитіс кулакнас аслыс морӧсас. Аддзис менӧ, тӧдтӧмтӧ, да арыштіс синъяссӧ. — Это еще что?! Кто такая?! Где артист этакой?!

Ме тӧді сійӧс. Тайӧ вӧлі нималана роч поэт Журавлёв-Печорский. Ме, йӧюкыд, и висьталі, мися, чойыс дорӧ петіс, регыд локтас. Пуксьы, мися, шойччышт.

А гӧсьтыдлы кутшӧм пуксьӧм! Бара тай кыдз шызис:

— Значит, к Екатерине Второй на квартиру?! А почему не в горком?!

Ме нин и повзи. Эз кӧ Серафим Алексеевич пыр да нуӧд гӧсьттӧ ме дорысь, эг и тӧд эськӧ, мый керны. Мездіс менӧ Серафимушкоыд. Сійӧ, кыдзи и пыр, тэрыб, да тайӧ разыс тӧдчӧ — дӧзмӧма Василий Дмитриевич вылӧ (шуис тай жыр пытшкӧссӧ кытшов вӧчӧм бӧрын: «Леканов некор абу места вылас»). Но ыждалысь Журавлёв-Печорскийыдкӧд эз зык пан, а коскӧдыс сывйыштіс да зэв лӧсьыда шуис:

— Васюкӧ, Нинасӧ повзьӧдан. Тайӧ миян выль том автор и сотрудник. Петалам мӧдарас, «Кодзулӧ». Аддзылі, тэнад кодь жӧ гора гӧлӧса Педӧр Щербаков сэтчӧ локтіс, сыкӧд варовитыштанныд.

Петан ӧдзӧслань ёртсӧ кыскиг, Серафим Алексеевич бергӧдчыштліс мелань да гажа гӧлӧсӧн и юӧртіс:

— Нина, «Кӧч гӧснечыд» тэнад петӧма! Типографияысь аддзылі...

Найӧ петісны, да кокниа и ышловзи. Бур юӧр Серафим Алексеевич вайис дай налькйӧ шедӧмысь на мездіс. Сэтчӧ жӧ пырисны Тамара Чисталёва да Надежда Митюшова, тані музеяс уджалысьяс. Менӧ помӧдз лӧньӧдісны.

— Овлӧ Журавлёвыслӧн, — кайтіс Тамара Чисталёва. — Но сійӧ зэв прамӧй морт и поэтыс енбиа. А Серафим Алексеевич дак медся бур отсасьысь миян, выль материалтӧ кыськӧ бара и ваяс...

Регыд вуджӧдісны миянӧс выль местаӧ, вӧвлӧм Совмин керкаас. Сэні жӧ лои «Войвыв кодзувлӧн» редакцияыс, а сідзжӧ «Югыд туй» газет. Отпускысь локтіс и Г. Юшков. Н. Мирошниченкоӧс нӧшта босьтісны выль уджалысьӧн, рочӧн гижысьяслы литконсультант пыдди. Восьтісны и художественнӧй литература пропагандируйтӧм могысь торъя бюро. Коля Белых да Юра Ионов зэв зіля босьтчисны тайӧ колана уджас. И дерт жӧ, Серафим Попов вӧлі медся зіль да пӧслукман тайӧ литература пропаганда уджас. Сылӧн шоч лун кольліс, медым эз пырав бюроӧ путёвкала лыддьысьысьяскӧд аддзысьлӧм вылӧ. Асывнас тай сӧмын на локтан удж вылад, кылан: кодкӧ тотш-тотш кайӧ нин кузь поскӧд вылыс судтаас... Тшук Серафим Попов. Сійӧ и эм. Шарк пырас. Дисциплинатӧ сійӧ тӧдіс.

— Ӧкмыс час нин, а бюроын некоднанныс на абуӧсь, безобразье! Визинӧ талун мӧдӧны-а... Леканов абу на жӧ и...

Регыд и пырӧ Коля Белых. Тэрмасьӧма, кашкӧ.

— А, Серафим Алексеевич, тэ тані? — горӧдӧ сійӧ. — Лэччӧ давай! Нина, тэ пасьтась жӧ. Машина кильчӧ помын нин. Изъюр Иван сэн жӧ нин. Володь Поповӧс нӧшта чукӧста. А Леканов Колеговкӧд министр машинаас каяс. Со кутшӧм десант талун вӧчлам Визингаӧ да сысянь Щугрӧм посёлокӧдз!

— Важӧн колӧ, — кайтыштӧ Серафим Алексеевич да содтӧ: — кӧн сӧмын и эг выступайтлы нин, а Щугрӧмас эг на волы. Зэв окота аддзывны. Нималана леспромхоз...

— Кайлам, аддзылан, — пос кузя увлань лэччигӧн нин кайта Серафим Алексеевичлы. Меным любӧ... Ог ӧд кытчӧкӧ мунӧй, а миян Щугрӧмӧ, менам радейтана ельдӧгаинӧ. Ыджыд леспромхоз ӧні сэні, дай воча чой гозъя сэні олӧны...

Колӧ шуны, сэки зэв лӧсьыд вӧлі гижысьяслы ветлыны лыддьысьысьяс дортіыд. Вӧлі аслас Союзыслӧн машина и асланым шопер — Ӧльӧксей. Ӧльӧксейыс миян Анюта-машинисткалӧн верӧсыс, да быттьӧ ас морт жӧ. Пыр и сюйсяс пассажиръясыдлӧн сёрни костад. Сӧмын пуксим машинаас, Володя Попов мыйкӧ кутліс висьтавны, да шоперыд и торкис аслас суитчӧмӧн.

— Ага, талун кык Поповӧс нуа! Володя со кутшӧма вӧччӧма, еджыд дӧрӧма да галстука. Тӧдӧ, небось: райкомас, начальство дорас, пыртласны. Серапим, тэ мый галстуктӧм?

Воча кывсӧ сылы сетіс ӧнӧдз пыр на лӧня пукалысь Иван Изъюров. Гмыкнитыштіс да шмоньпырысь и шуис:

— Ӧльӧксей, тэ регыд на новлӧдлан миянлысь гижысьястӧ да этша на и тӧдан. Серапимыс тайӧ миян и Верховнӧй Сӧвет президиумад мунігӧн, буракӧ, эз пасьтавлы галстуксӧ, а ӧні...

Изъюров малыштіс ёртсӧ пельпомӧдыс, а Серафим Алексеевич гогнитыштіс юрнас да зэв тэрыба горӧдіс:

— Нет! — сэсся вӧлисти тӧдчӧдыштіс ассьыс «нет» кывсӧ. — Да-а, кыкысь кымын голяӧ крукӧдлі жӧ! А сэсся... Коми мортыс менӧ сідз на гӧгӧрвоас, — шуис, быттьӧ кывкӧрталіс.

Сэтчӧ бара пыр и ыззис Володя Поповным.

— Правильнӧ шуан, вокӧ, правильнӧ! — сійӧ пондіс зіля тапйӧдлыны кияснас и Серафимлы, и Изъюр Иванлы пельпоманыс да горзыны: — Мада вокӧяс, мада вокӧяс! Тіянкӧд ёна и гажа! — Та бӧрын мыйкӧ сьылыштіс вомгорулас да бара варовмис. Мунамӧ пӧ Сергей Морозов рӧдинаӧ, Визингаӧ, а сійӧ кольччис издательствоӧ аслас жырйӧ. Ёна, буракӧ, и завидьтӧ миянлы.

— Зато меным лӧсьыд! Щугрӧмӧ ӧд тшӧтш ветламӧ, — сюйся ме Володь кывъяс дорӧ. А сійӧ менӧ нин пельпомӧ лапӧдӧ да ошкӧ: — Мада ань, мада ань! Збыль ӧд, сійӧ Щугрӧмыс тіян Кебраын!

— Код тӧдас, кӧн-я, — шуышта ме да сёрнисӧ ог на орӧд, водзӧ висьтала. — Кольӧм ар тай ветлімӧ ельдӧг вотны Щугрӧмас, да ягас миянлы первой Геннадий Юшков паныдасис-а. Гӧтырыскӧд. Асланыс машинаӧн ельдӧгла жӧ воӧмаӧсь. А водзӧ мӧдім, да Колегов паныдасис, миян министрыд. Сэсся та бӧрын сьӧкыд и шуны, кӧні Щугрӧмыс, Кебраын али Сыктывкар дорын. Буди, медся гажа ягас да медся ельдӧгаинас! Сэсся нинӧм ог куж содтыны.

Тайӧн эськӧ и кӧсйи помавны варовитӧмӧс, да Иван Изъюров шыасис:

— А миянӧс коркӧ тадзи жӧ аслас Зӧвсьӧртӧ нуӧдлас и Серафим Алексеевич. Зӧвсьӧртсӧ сійӧ ёна жӧ радейтӧ.

Ме, тӧлктӧмыд, буракӧ, не местаӧ и шыаси друг: мися, ми Надежда Мирошниченкокӧд неважӧн на вӧлімӧ сэні. Фанернӧй заводса клубас школьникъяскӧд аддзысьлімӧ. Меным сэтшӧма кажитчис клубыс! Сэтшӧм ыджыд, мича стрӧйба! И челядьыс...

— Ук-к, Нина! — кузя ышловзис Серафим Алексеевич. — Зӧвсьӧртыс ӧмӧй сӧмын фанера вӧчан заводыд! Зӧвсьӧртыс сійӧ... Ме тэнӧ, Нина, турипув вотны коркӧ нуӧдла! Аддзылан...

Тайӧ «аддзылан» кывнас сійӧ шуис ставсӧ. Чужан-быдман местаыслысь мичлунсӧ и озырлунсӧ, радейтӧмсӧ и сьӧлӧм дойяссӧ, и, дерт, лов кыпавлӧмсӧ. Бур поэтыд, буракӧ, не сӧмын кывбурнас, но и ышловнас сяммӧ висьтавны пыді дум-мӧвпъяссӧ.

Здук кежлӧ чӧв-лӧнь пуксьыліс, а сэсся бара жӧ миян медвизулыс, Володя Попов, торкис чӧв-лӧньсӧ:

— «Общество любителей книгаыд» тай ӧні быдлаын эм. Чукӧстласны кӧ, ветлам и Зӧвсьӧртӧ! Изъюров кӧть, Нина ни ме ог ӧткажитчӧй, Серафим Алексеевичӧ! Да нӧшта на кытчӧ ог ветлӧй! Абъячойӧдз и Вӧркутаӧдз мыськовтлам!

Кыкнан Поповсӧ тай и лои гарыштӧма. Ӧти лун-войӧ ӧд и чужлӧмаӧсь, коркӧ выль вося Василей-Рӧштво лунъясас. Югыдін да шоныдін налы. Некоднанныс нин абу ловъяӧсь, а казьтылӧмыс коли.